Kryeministri Rama deklaroi sot në një konferencë për shtyp se nuk ka rihapje të lojërave të fatit.
Kryeministri tha se lajmi i përhapur në media sipas tij se do të rihapen kazinotë nuk është i vërtetë por se është vetëm një procedurë specifike.
“Nuk ka asnjë hapje kazinosh. Është një procedurë specifike që lidhet me përfundimin e afatit të licenscs të së vetmes kazino që është në mes të Tiranës dhe duke pritur që cilido që të ofertojë nëse ka ofertë në një zonë të caktuar, janë vetëm kufijtë e një perimetri. Në ligjin ekzistues kemi të drejtën e kazinove vetëm në struktura me 5 yje ose në zona të veçanta strategjike për zhvillimin dhe për turistët gjë që nuk e kemi ushtruar masivisht dhe nuk do ta ushtrojmë masivisht. Në hotele me 5 yje po.”, tha Rama.
Së fundmi qeveria ka miratuar dy vendime të lidhura me lojërat e fatit që sinjalizojnë mundësinë për rritje të numrit të kazinove ku së pari koordinatat se ku lejohet aktiviteti kazino brenda qytetit dhe që saktësisht përfshin zemrën e tij nga rruga e Barrikadave tek Urani Pano Rruga: “Dedë Gjon Luli”; Rruga: “Ibrahim Rrugova”; Bulevardi: “Zhan D’Ark”, Rruga: “Xhorxh W. Bush”.
Konkretisht kjo zonë përfshin pjesën nga 15 katëshi tek unaza tek parku Rinia, tek Xhorxh Bush që është në Unazë në rrugën ku ndodhet edhe selia e Partisë Demokratike. Vendimi i dytë përcakton kriteret për garën për dhënien e një licence.
Sipas ligjit “Për lojërat e fatit” licenca e një kazinoje kushton 1 miliardë lekë për vetëm një sallë lojë dhe kjo shumë duhet të shlyhet në mënyrë të barabartë çdo vit përgjatë gjithë periudhës së licencës(10 vjet çka do të thotë 100 milionë lekë çdo vit). Subjektet duhet që të kenë një kapital 1.2 miliardë lekë ndërkohë që vendimi i qeverisë përcakton sesi do të veprohet me shpalljen e garës.
Ndërkohë Autoriteti i Mbikëqyrjes së Lojërave të Fatit ka çelur garën për dhënien e licencave për kategorinë kazino për të gjithë subjektet e interesuara./ Opinion.al
