Kryeministri Edi Rama e ka nisur fushatën e tij elektorale me gratë në një takim ”Vajzat dhe Gratë Socialiste për Shqipërinë 2030”.
Gjatë fjalës së tij Rama është shprehur se Partia Socialiste ka çuar buxhetin e shëndetësisë në 1 miliardë Euro. Rama gjatë fjalës së tij ka theksuar se gjatë mandatit të katërt të qeverisjes së Partisë Socialiste do të zgjerojnë rrjetin e shërbimeve sociale.
“Në të gjithë rrugëtimin tonë të shtetbërjes europaine ku reformat e vështira, masat shtrënguese, mundësitë të pamjaftueshme që kanë kufizuar, ne nuk e kemi harruar asnjëherë asnjë minutë se njerëzit janë arsyeja madhore e qeverisjes sonë dhe në këtë PS e ndihmon krijimi i këtij kapaciteti të burimeve njerëzore gra dhe vajza që ka në të gjitha nivelet. Prandaj sot ne e kemi çuar buxhetin e shëndetësisë në 1 miliardë Euro dhe prandaj e kemi trefishuar buxhetin e ndihmës ekonomike dhe prandaj kemi financuar 84 shërbime të reja sociale për rreth 44 mijë përfitues. Kemi dyfishuar ndihmën për gratë kryefamiljare me dy apo tre fëmijë.
Kemi krijuar dhe fuqizuar programin e bonusit të bebes duke mbështetur afro çerek milionë bebe, me një vlerë që deri tani ka arritur një vlerë 170 milionë Euro dhe prandaj në mandatin e katërt do ta zgjerojmë rrjetin e shërbimeve sociale me 40 shërbime të reja sipas hartës së nevojave. Do të krijojmë 20 ndërmarrje të reja sociale për gratë dhe vajzat në nevojë”, deklaron Kryeministri.
Gjithashtu Rama ka pasur një lajm të mirë edhe për familjet e fëmijëve autik apo me nevoja të veçanta.
“Njëkohësisht mandati i katërt do të sjellë një lajm shumë të mirë për nënat e fëmijëve autikë apo nevoja të tjera të veçanta për të cilat do ta rrisim mbështetjen aktuale deri në dyfishimin e saj. Ne kemi vendosur për herë të parë mësuesin ndihmës dhe sot nuk kemi asnjë shkollë ku ka fëmijë të tillë dhe nuk ka mësues ndihmës. Sot janë 2100 mësues ndihmës, por ama nuk do të ndalemi këtu. Do të shkojmë më tutje. Ashtu sikundër kemi filluar ndërtimin klasave për fëmijët e shtruar në pediatri. Klasa të veçanta me kurikul të veçantë dhe mbi të gjitha do ju japin atyre ndjesinë që ata janë të mbështetur nga shoqëria”, thekson Rama.
