Kryeministri Edi Rama, mesditën e sotme, ka drekuar me peshkatarët në Portin e Durrësit. Në një tryezë të improvizuar pranë detit, i ulur në mes tyre, Rama ka dëgjuar nga afër shqetësimet e peshkatarëve.
Dreka transmetohet Live në Facebook, në faqen e kryeministrit.
“Gjendja është skandaloze, edhe jetën e njerëzve nuk e kemi të garantuar, jo mjetet jo e jo. Nëse ia lë porosi Vangjushit dhe po e mori përsipër, ne ia hodhëm”, tha një nga peshkatarët.
Teksa ka dëgjuar shqetësimet, kryeministri nuk ka hezituar të bëjë batuta me peshkatarët.
Rama ka pranuar se kushtet janë mjerane. “E drejtë, kur u futa unë këtu, thashë o zot, si burgu i detit”.
“Kur Kryeministri nuk di not, nuk di të bëj port”, ka thënë Rama, duke i njohur peshkatarët me projektin që pritet të bëhet.
Rama teksa ka publikuar këtë video online në rrjetin social, Facebook, ka theksuar se “Ekonomia e peshkimit nga një rrumpallë në 2013 në një treg të formalizuar ku sot numërohen 1000 vende më shumë…”
Shkollat profesionale, peshkatari: Unë kam 25 egjiptianë. Kryeministri: Pse?
Njëri prej peshkatarëve e ka lavdëruar kryeministrin për cështjen e shkollave profesionale. “Për atë arsimin profesional ke bërë gjënë më të mirë”.
Peshkatari: Unë kam 25 egjiptianë nën shërbimin tim në anije
Rama: Po pse egjiptianë
Peshkatari: Se kanë shkollë peshkimi
Rama: Epo shkolla jonë e peshkimit do bëhet tani dhe do keni punonjësit tuaj profesionale. Sepse nuk mund të merrni një jurist peshkatar
Rama nuk pranon të pijë verë
Në drekë bie në sy që të gjithë pijnë vetëm ujë. Historitë legjendare të peshkatarëve janë zakonisht me rum, por peshkatarët shqiptarë janë tek vera e rakia.
Në një moment peshkatarët e kërkojnë leje kryeministrit Edi Rama për të pirë verë, por kryeministri nuk i lejon.
Peshkatari: Mund ta qisim ndonjë gotë vere, do na japësh leje.
Rama: Jo mo lere tashi se kemi punë tjetër.
