Kryeministri Edi Rama, ditën e sotme, ka dhënë disa detaje në lidhje me projektin e ri të ndërtimit të Rrugës së Arbërit.
Rama nga Dibra, gjatë këtij prezantimi, nuk ka lënë pa shigjetuar edhe paraardhësin e tij, për ato që i ka quajtur mashtrime për rrugët e lëna rrugëve.
Kryeministri ka treguar me detaje se pse nuk ishte i pranueshëm projekti i parë dhe se për çfarë u preferua projekti i ri, i cili jo vetëm është më ekonomik, por favorizon më shumë zonën.
“Projekti i parë që në fillim ishte jashtë standardit të BE dhe me kërcënim për sigurinë e njerëzve, nëse ne do kishim ecur me atë projekt që ishte shumë shtrenjtë, ne nuk do ta mbaronim, edhe një rrugë që do mbetej rrugëve, 1,1 km për të bërë lidhjen me Tiranën dhe 9 km për të shkuar në Bllacë, që sot janë të përfshira në projektin e ri. Ne nuk do ndërhynim dot në 15 km të lëna rrugëve dhe nuk kanë as shtresa, as mbrojtje skarpatesh as sinjalistikë, pra do ishte, po dole në fund dole, duke vazhduar në një segment me gropa e me rreziqe, nuk ishte parashikuar degëzimi i Klosit që do të bënte që Klosi dhe Burreli të mos kishin akses, për vetëm 3,1 km. Nuk do të bënim dot, rindërtimin e Maqellarë-Bllacë, që do e bëjmë sot, vlera e këtij projekti me gjysmën e km që do ndërtohen sot ishte më e madhe se vlera e këtij projekti që është dyfishi i km dhe që i jep mundësi jo vetëm Bulqizës apo Peshkopisë, por edhe klosit dhe Burrelit që të shkurtojnë distancën, janë 90 km në një shteg për të shkuar nga Burreli në Tiranë, do bëhen 50, dhe koha do jetë shumë më e shpejtë”- tha ai.
Duke kujtuar thëniet dhe premtimet e dikurshme të Berishës, Rama tha se ato ishin vetëm premtime dhe prerje shiritash për rrugë të lëna rrugëve.
“Në disa rrugë nga ka automjete që se konkurrojnë dot kalin. Vetëm pak vite më parë, një paraardhësi imi thoshte se; ‘ky 4-vjeçar, do të jetë 4-vjeçari i përfundimit të rrjetit modern rrugor, duke nisur nga Tirana, skaj më skaj’. Sot i bie duhet të kishim ardhur nga rruga e Arbrit. Keni parë gjë ju nga këto? Zero, as për dy vjet, e as për katër. Ju keni parë shiritat e pafund që janë prerë dhe kilometrat e numëruara në letër që ju janë dërguar popullit. Gjithçka trashëguam nga ai kapitull ishte një mal me borxhe dhe rrugët të gjitha të lëna rrugës. Vet Rruga e Arbrit u la rrugës, vetëm për t’u hedhur hi syve njerëzve. Sot jemi këtu se tani më Rruga e Arbit nuk është më as ëndrra shekullore e dibranëve, që këtë rrugë e kanë dashur të paktën prej 1 shekulli, e as një premtim politikanësh. Por zotim i mbajtur, për të cilin jemi angazhuar që ditën e parë.”
