Kryeministri Edi Rama ka folur këtë të premte nga Himara në lidhje me letrën publike që i dërgoi Presidenti Ilir Meta.
“Më kishte çuar dhe një letër mbrëmë, një letër dashurie që çuditërisht baba Xhikja e çoi pasi u dogj KZAZ-ja. Dashuri me kod, reflekto se shiko se çfarë po ndodh. E kujtonte dhe Ramiz Alinë, që shtyu zgjedhjet. Ai i shtyu zgjedhjet se ishte i gjithë populli në rrugë, i shtyu zgjedhjet sepse kështu si erdhi koha sot që Bujar Nishani duket Xhefersoni në krahasim me baba Xhiken. Po këtu ku është populli këtu që kërkon shtyrjen e zgjedhjeve? Populli i kryetarit të bashkisë së Vaut të Dejës, apo ata që çojnë njerëzit për të djegur shkollën dhe kur vajti të jepte llogari përpara ligjit tha: shkova për t’i qetësuar”, tha Rama.
Presidenti Meta i dërgoi letër publike kryeministrit Rama, pasi ky i fundit vendosi të mos njohë dekretin e ri për mbajtjen e zgjedhjeve më 13 Tetor. Kreu i shtetit i kërkon Ramës të reflektojë. Ai e nis letrën me refuzimin e takimit.
“Ti më ke privuar padrejtësisht, si në planin institucional, ashtu edhe në atë njerëzor, nga mundësia për t’u takuar bashkë. Jam thellësisht i indinjuar dhe njëkohësisht i brengosur që pritjes sime sot, nga ora 05:00 e mëngjesit ti i’u përgjigje me një të larë në pishinë vetëm 200 metra larg Presidencës. Doja ta vendosnim bashkë datën e zgjedhjeve dhe kam që nga data 8 qershor 2019 që të pres e të pres, me shpresë.”
Meta shpjegon dhe arsyen përse zgjodhi datën 13 Tetor për zhvillimin e zgjedhjeve.
“U vendos sepse kjo është data më e shpejtë për të garantuar të drejtën e opozitës për të marrë pjesë në zgjedhje, por edhe për të garantuar përfshirjen në procesin e administrimit të zgjedhjeve. Ne të dy e dimë mirë, nga ata që vendosin për të ardhmen europiane të Shqipërisë, se nuk ka çelje të negociatave me Bashkimin Europian me zgjedhje monopartiake, siç ja ke marrë vrapit t’i bësh ti, përkundrazi.”
Presidenti flet edhe për qëndrimin e Ramës, i cili thotë se data 13 Tetor ka lidhje me ditëlindjen e ish-kryeministrit Berisha.
“Ti e di që unë nuk ta kam fshehur asnjëherë, as ty dhe as publikut, dobësinë që kam për Doktorin. Njerëz jemi, kemi edhe pika të dobëta. Por edhe ti nuk është se e “urren” aq shumë sa aktron para kamerave dhe militantëve të tu. Aq më tepër që marrëveshjet më të mëdha në këtë vend i keni bërë ti dhe Doktori, siç ishte edhe ajo brenda natës që ndryshoi themelet e Kushtetutës, që ishte votuar me referendum nga i gjithë populli, dhe pasojat e të cilës i vuajmë edhe sot.”/ Opinion.al
