Kryeministri Edi Rama, nga Forumi Ekonomik Botëror në Davos ka folur për sulmet kibernetike të Iranit teksa është shprehur se sulmet vazhdojnë çdo ditë.
Rama tha se sulmi ndaj vendit tonë nisi me shërbimet publike, por shtoi se infrastruktura kritike është në rrezik çdo ditë.
“Jemi ende nën sulm. Praktikisht çdo ditë. Është shumë sfilitëse, e frikshme. Dhe disi pamë anën tjetër të këtij bekimi të teknologjisë, që është mallkimi i teknologjisë”-tha Rama.
Më tej Rama shtoi se ndërtimi i mbrojtjes kibernetike kërkon kohë dhe mbi të gjitha shumë fonde.
“Po të pyesësh çdo kryeministër në botë se çfarë mendon për kostot, do të thotë që ndjen dhimbje. Ndaj nuk është një pyetje shumë e mirë, por do përpiqem t’i mbijetoj dhimbjes. Është ndryshe kur investon për të bërë diçka, sepse njerëzit do ta shohin dhe do të të mbështesin; Është ndryshe kur investon për të mos lejuar diçka të ndodhë. Njerëzit do thonë, nga çfarë po e mbron, nuk , nuk ekziston”-tha Rama.
Të tjerë të ftuar në panel nënvizuan se hakerat do të jenë gjithmonë një hap përpara në luftën kibernetike, por me anë të bashkëpunimit midis qeverive dhe kompanive, dëmi i tyre mund të kufizohet.
