Për herë të parë Kryeministri Edi Rama deklaroi mbrëmë në “Opinion” se LSI nuk meriton të jetë më në qeverisje, duke lënë të nënkuptuar se do të mbetet në opozitë.
Sipas Ramës partia e Ilir Metës ka ndarë pushtet dhe ka përfituar prej tij në fillim me PD dhe më pas me PS, por në fund ka drejtuar gishtin nga partia e madhe duke akuzuar se faji ishte i tyre.
“LSI kërkon ta mbajë një dorë në timon dhe dorën tjetër ta ketë të lirë të akuzojë sa herë vjen radha për të ndarë pushtetin duke akuzuar partinë e madhe”, tha Rama në Opinion.
Paraditen e sotme ai ishte në Gjirokastër dhe foli sërish për të njëjtën gjë: Kur qeveris me aleatë, ata janë pengesë.
“Kam dëgjuar lloj-lloj batutash. Është e thjeshte simbolika, nëse je në timon ke përgjegjësinë, nëse je i detyruar të mbash të tjerët në prehër që të mbajnë dorën në timon përgjegjësia e madhe mbetet, por vështirësia për të ecur drejt pa kthesa, ndalesa, pengesa, është shume e kufizuar”, tha ai.
