Teksa po mbahet Konferenca Kombëtare për të drejtën e Informimit, kryeministri Edi Rama ka deklaruar se Shqipëria është në vendin e 7-të sa i takon legjislacionit për të Drejtën e Informimit, por kur vjen puna te zbatimi i tij niveli s’është i njëjtë.
Gjatë fjalës së tij, Rama theksoi se informacioni mbi vendimmarrjet e institucioneve të caktuara në vend janë pronë publike.
“Po e nis nga një fakt i cili është i nënvizuar në klasifikimin e Access Info Europe që është agjencia, trupa që merret me vlerësimin e legjislacionit për transparencën. Shqipëria ishte e 86-ta në klasifikim deri në vitin 2014 kur ne hodhëm hapin e parë serioz duke transformuar bazën tonë ligjore. Sot, nëse e klikoni Shqipërinë do e gjeni në vendin e 7-të, sa i përket legjislacionit. Madje Komsioneri që është dhe nga Labëria që s’mund ta pranojë dot të jetë i 7-ti, po më thoshte që disa ndryshime të reja që kemi bërë dhe ligjin e ri që kemi gati, ne do ngjitemi dhe më lart. Këtu fillon edhe debati, që në këtë rast e kemi me një shembull, por mund ta gjejmë në të gjithë jetën e vendit sot.
Hendeku mes legjislacionit dhe zbatimit të tij. Kur dëgjon se 70% të ankesave për mungesën e së drejtës së informimit që vijnë në zyrën e komisionierit, janë ankesa që pëmrbushen në sekondë pasi zyra vihet në lëvizje dhe i këkron institucionit përkatës të informojë qytetarët është për të vënë duart në kokë. Kjo është thjesht dhe vetëm një mungesë e funksionimit të një mekanizmi terësor që e garanton të drejtën e informimit pa pasur nevojë për subjektivitetin e atyre që kujdesen për ta garantuar këtë. Dhe që nuk e bëjnë në mënyrë sistematike. Kjo dhe disa aspekte të tjera që na pengojnë ne që siç jemi të 7-ët në aspektin e legjislacionit, të jemi në nivel më të lartë të drejtës së informimit, janë fruta që mund të kapen pa u sforcuar shumë dhe pa kërkuar shkallë për t’u ngjitur hap pas hapi.
Tjetra që bën shumë përshtypje, është që ende sot ka një mendësi dominante në administratë që dhënia e informacionit është një ekspozim i panevojshëm. Ndërkohë që bëhet fjalë për të dhënë informacion mbi vendimmarrjet. Është absolutisht sa dramatike, aq edhe qesharake, kur pastaj marrja e informacionit, dokumentave që praktikisht janë shkruar e firmosur e që ekzistojnë, e nxjerrja e tij në publik paraqitet si një zbulim.
Gjeta një dokument! Në fakt ai s’është pronë e askujt në institucion, as e qeverisë, por është pronë publike. Dhe si e tillë duhet të jetë e aksesueshme. Lëndina e të gjithë dokumentacionit në institucionet shqiptarë është njësoj si një park publik. Edhe këtu besoj që mund të bëjmë një progres të shpejtë.”
Rama theksoi se dezinformomi mund të luftohet vetëm duke e mekanizuar procesin e dhënies së informacionit.
“E treta, nuk ka një mënyrë më efikase për të përballur dezinformimin duke informuar më shumë. S’ka mënyrë më demokratike e ballafaquese për t’ju kundërvënë dezinformimit, sesa rritja e informimit. Informacioni i bazuar në cka realisht është e shkruar e zeza mbi të bardhë nuk shkon në proporcion me këtë si një vullnet për t’u përballur. Nuk është çështje koordinatorësh, është çështje që ne duhet ta përballim duke e mekanizuar totalisht. Fatmirësisht jetojmë në një kohë kur teknologjia është bekim për vende si yni, që prapambetjen që lidhet me mungesën e traditës së shtetit ta kompensojnë me zhvillimin teknologjik.”
