Kryeministri Rama ka vizituar sot në mëngjes zonën e Kombinatit ku ka takuar banorët, shtëpitë e të cilëve kanë pësuar dëme nga tërmeti i 26 nëntorit.
Gjendja e panikut për shtëpitë e tyre si dhe netët e kaluara jashtë kanë bërë që banorët ti drejtohen kryeministrit edhe duke debatuar.
Një grua i kërkon zgjidhje, duke iu ankuar se po rri jashtë me fëmijë te vegjël.
“Shko te qendra qe është për ketë pune, pastaj do ta zgjidhim hap pas hapi. Ti do vish me mua tani, me gjithë vajzën, merre puthe atë dhe falëndero Zotin, se 22 njerëz i futem ne dhe dje”- tha Rama.
Por qytetarja i tha se nuk mundet pasi është në punë. ‘Me zor nuk te marr unë, unë te them eja me mua për dore te coj unë, nëse nuk do me zor nuk te marr’, iu përgjigj Rama.
Të njëjtin problem kishte dhe një tjetër qytetare e cila i kërkoi kryeministrit ‘ku te flemë, duam te flemë’.
“Eja me mua, te çoj te qendra sociale, dhe te ve unë ne gjumë, mos rrini neper makina se do ju punoje truri si makine e prishur pastaj.”, u përgjigj Rama
Një tjetër grua, qe i është dëmtuar banesa një katëshe i ankohet se nuk do si te beje tani.
“Po ti ç’do, ne jemi për pallatet këtu. Ti dhe unë kanunari qe i kemi njëkatëshe, një vrap i kemi e dalim, edhe pse unë nuk lëviz fare nga krevati, le te bjere termet. Është e shkruar kjo xhan, ti ikën i tërmetit e gjen te rruga, del aty, fap rreshket te lëkura e portokallit.”, tha kryeministri.
Situata ishte dukshëm e tensionuar deri sa në një moment Rama tha “Do me lini ta mbaroj ketë fjale, se ka shume me keq se ju tani? Aman ore se me doli shpirti, u çmenda, nuk kam me fuqi, na lini te bëjmë analizën me inxhinieret, bëjnë nuk bëjnë godinat. Lërini rrofsh, secili do rroje sa e ka te shkrujt, nuk e gjen nga tërmeti, e gjen te rruga”. /Opinion.al
