Në një takim me fermerë, ku ka shpjeguar paketën e rezistenës sociale Kryeministri Rama është ndalur në rritjen e çmimeve që ka sjellë situata në Ukrainë. Ai është shprehur gjithashtu se çmimi i hekurit është trefishuar çka rrezikon kontrata dhe investime publike që do të sillnin për pasojë lënien pa punë të mijëra njerëzve.
“Nuk ka hyrë në luftë një mëhallë me një mëhallë tjetër, nuk ka hyrë në luftë Sukthi me Manzën, por ka hyrë në luftë një fuqi e madhe tregtare për shkak se zotëron një pjesë të konsiderueshme të burimeve natyrore të naftës, gazit dhe të lëndëve të para që nga hekuri e deri tek drithërat siç është Rusia dhe një nga prodhueset kryesore të drithërave, por edhe të hekurit dhe të materialeve të lëndëve të para siç është Ukraina. Janë dy forca të hyra në luftë, por janë edhe dy tregje.
Sot ka ndaluar pjesa më e madhe e investimeve publike dhe private. Pse? Sepse hekuri është rritur trefish. Kontratat tona, për tunelin e Llogarasë dhe investimet e tjera janë me çmimin e hekurit 3 herë më pak. Tani për të vazhduar ata na thonë, ne nuk mund të vazhdojmë kontratën kur këtu, jo për fajin tonë, por për një forcë madhore ka ndodhur kjo se falimentojmë. Çfarë duhet të bëjmë ne? Të shtojmë financat apo të themi stop sa të mbarojë kjo situatë? Shumë njerëz i bien shkurt, lëri investimet, këtu puna është jepi lekë njerëzve. Por lëri investimet është një fjalë goje se domethënë do të thotë ço në shtëpi pa punë mijëra njerëz dhe domethënë hiq dorë nga taksat që do marrësh prej atyre investime. Dhe e treta prano që duke hequr ato investime futesh në një spirale rënie ekonomike se investimet e rrisin ekonominë. Se për të rrit rroga dhe pensione na duhet të rrisim të ardhurat, kush e rrit ekonominë, e rrisin investimet, nuk e rrisin shpenzimet”, u shpreh Rama./Opinion.al
