Kryeministri Edi Rama u shpreh se i ka tërhequr vëmendje kryetares së Partisë Socialiste të degës Tiranë, Blerina Gjylameti, për qëndrimin e saj në lidhje me shkrimin e publikuar në gazetës gjermane “Bild”.
“Unë nuk kam nxjerrë askënd për këtë. Madje i kam tërhequr vëmendje për deklaratën e saj. I thash se burimet janë këta të dy këtu”,-tha Rama në Opinion.
Gjylameti u shpreh më herët se opozita ka paguar para për të dëmtuar imazhin e Shqipërisë dhe për të goditur ekonominë e turizmin.
“Ata që paguajnë para për të nxirë imazhin e Shqipërisë në Botë, për të goditur ekonominë dhe turizmin, sot dalin dhe rrahin gjoksin krenarë për zullumet që i bëjnë Shqipërisë. Është e vërtetë, artikuj si ai i djeshmi në gazetën gjermane, i bëjnë dëm imazhit të vendit jashtë”,-është shprehur Gjylameti.
Ndërkohë , ka ardhur dhe reagimi i ish-ministrit Ylli Manjanit, i cili shprehet në postimin e tij në “Facebook” se deklaratat e Ramës se shkrimi është bërë prej tij është gënjeshtër. Manjani sqaron se shkrimi është shkruar nga Peter Tiede dhe jo prej tij.
Reagimi i Manjanit
Mora vesh që Kryeministri, në Opinion paska thënë që shkrimin në Bild e kam bërë unë.Jam i shtrënguar të deklaroj se ky pohim publik i Kryeministrit është i gënjeshtërt. Ashiqare madje!
Nuk e di nga buron nevoja për të gënjyer, nga mllefi që ka me mua, nga përmbajtja e atij shkrimi apo nuk di më të lexojë?!
Po fundja ç’rëndësi ka arëryeja përse gënjen.
Fakt është që ai artikull është shkruar nga Peter Tiede dhe jo nga unë.
Fakt është që unë jam cituar për deklarime të hershme të miat në atë shkrim vetëm me tre fjali.
Nëse ato tre fjali janë ende të pagëlltitshme nga Kryeministri, ky është problem i Tij, jo imi.
Mjerim i madh duket, kur Kryeministri lë çdo punë e shpik skenare me shkrime gazetash.
Sidoqoftë, prap po pyes: pse Bild zgjodhi të më citojë mua dhe jo Kryeministrin bie fjala?
Ai flet më shumë se unë…
Dhe me në fund, meseletë me fall e me fallxhorë tua tregojë plakave të Surrelit, në ja pranofshin edhe ata, jo mua!
Mendimi dhe fjala ime janë të miat, si gjithmonë./ Opinion.al E.Xh.
