Pronarët e shpronësuar nga regjimi komunist, të cilët nuk kanë bërë ende kërkesë për kthimin e pronës kanë afat deri në fillim të javës tjetër. Agjencia e trajtimit të pronave tha se ata që nuk e respektojnë këtë afat e humbasin përfundimisht pronën.
“Të gjitha strukturat e agjencisë janë vënë në dispozicion të qytetarëve për të pritur të gjitha kërkesat e reja për njohje pronësie të cilat duhet të depozitohen deri në ditën e hënë datë 23 maj të këtij viti, afat ky i cili i bazuar në ligjin e ri është përfundimtar”, u shpreh Drejtoresha e Agjencisë.
Ajo tha se pronarët duhet të paraqesin vetëm dy dokumente për pronën që pretendojnë, pozicionimin hartografik të saj dhe një dokument arkivor të njohur zyrtarisht. Ky apel i drejtoreshës ka bërë që dje në zyrat e AKKP-së të bëhej një… miting. Të gjithë u dyndën për të bërë aplikimin ndërsa stafi e kishte të pamundur t’i përgjigjej një fluksi kaq të madh, siç shikohet edhe nga foto e DITA-s.
Njerëzit shtyhen për të bërë kërkesën si dikur për radhën e qumështit. Kishte nga ata qytetarë që mundoheshin ta kalonin edhe me humor duke folur herë pas herë “edhe dy se u nisëm” për të treguar gjendjen anormale që ishte krijuar aty. Punonjës të AKKP-së të kontaktuar nga DITA nuk ishin të surprizuar nga ky fluks. “Duke u parë se si i lënë punët shqiptarët për momentin e fundit ndërkohë që kanë pasur tre muaj afat, nuk është ndonjë surprizë për ne. Do bëjmë të pamundurën që t’u përgjigjemi të gjithëve deri në përmbyllje të afatit”, u shpreh një punonjës i AKKP-së për DITA-n.
