Greqia, Qiproja dhe Izraeli kanë nënshkruar një marrëveshje për ndërtimin e një tubacioni nën det me gjatësi 1,900 kilometra për të transportuar gaz natyror nga Mesdheu në Evropë.
Kryeministri grek, Kyriakos Mitsotakis, kryeministri izraelit, Benjamin Netanyahu, dhe presidenti i Qipros, Nikos Anastasiades, kanë nënshkruar marrëveshjen e ashtuquajtur, Projekti Mesdheu Lindor (EastMed).
Tri qeveritë do të nisin thirrjet për investitorët e interesuar në këtë projekt dhe pritet që marrëveshjen përfundimtare për investime ta arrijnë deri më 2022, ndërsa punimet e tubacionit të përfundojnë më 2025.
Kjo marrëveshje e re krijon mundësinë që të zvogëlohet varësia nga furnizimet e Rusisë me energji dhe vjen në kohën kur shteti rus po përgatitet për të nisur dërgimin e gazit përmes dy tubacioneve në Evropë, pas marrëveshjeve të arritura me Turqinë dhe Gjermaninë.
Shtetet e Bashkuara dhe Bashkimi Evropian mbështesin projektin e Mesdheut, pasi Uashingtoni thekson vazhdimisht nevojën që Evropa të bëhet më pak e varur nga Rusia sa i përket furnizimit me gaz natyror.
Nga ana tjetër, Kongresi amerikan ka miratuar muajin e kaluar një projektligj që ndan 1 miliard dollarë në mbështetje të projekteve të energjisë në Evropën Lindore me qëllim të uljes së varësisë së këtij rajoni nga Rusia./Opinion.al
