Gjobat e majme që na janë faturuar nga Gjykata e Strasburgut kanë vënë në lëvizje Qeverinë shqiptare. Për t’i paraprirë qëndrimit që kjo e fundit do të mbajë mbi ligjin e ri të pronave, dy ministra të kabinetit Rama janë nisur për në Strasburg.
Ministri i Drejtësisë, Ylli Manjani dhe ministri i Financave, Arben Ahmetaj, u takuan dje me Presidentin e Gjykatës Europiane të të Drejtave të Njeriut, Guido Raimondi. Ata kanë kërkuar që të pezullohet marrja në shqyrtim e çështjeve, të cilat janë paraqitur për gjykim në Strasburg.
Kjo kërkesë e tyre është bazuar në argumentin se skema e re që ka nisur të zbatohet, me hyrjen në fuqi të ligjit, do të çojë drejt zgjidhjes së problemit 25-vjeçar të pronave në vend.
TAKIMI
Gjatë takimit, mësohet se ministrat kanë paraqitur me hollësi të gjitha angazhimet administrative, ligjore dhe financiare që janë ndërmarrë për zgjidhjen e çështjes së pronës në Shqipëri.
“Është e nevojshme të kemi një bashkëpunim nga Gjykata, duke marrë në konsideratë faktin se tashmë ka një ligj që ofron mekanizmin e munguar për trajtimin e kësaj çështjeje në Shqipëri”, mësohet të ketë thënë Manjani. Nga ana tjetër, ministri i Financave, Arben Ahmetaj, ka shprehur shqetësimin lidhur me efektet e rënda buxhetore të vendimeve të dhëna nga GJEDNJ, raporton panorama.
“Qeveria është përpjekur të ofrojë një zgjidhje të drejtë dhe proporcionale, pa dëmtuar interesat e brezave që do vijnë. Për 10 vitet e aplikimit të Ligjit, në buxhetin e shtetit do të ketë një zë më vete, ku do të alokohen fondet për këtë çështje”, ka theksuar ministri, teksa ka ripërsëritur kërkesën për pezullimin e vendimeve për të krijuar hapësirat e nevojshme për zbatimin e ligjit.
Në përfundim të takimit, Presidenti i Gjykatës Europiane të të Drejtave të Njeriu ka nënvijëzuar se është e rëndësishme që të ketë harmoni ndërmjet respektimit të të drejtës së pronës dhe interesit publik të atyre që paguajnë.
SITUATA
Aktualisht janë 413 raste të paraqitura për gjykim në Strasburg, të cilat do ta zhysnin vendin në kolaps, nëse do të shqyrtoheshin.
Disa muaj më parë, qeveria njoftoi se Komiteti i Ministrave kishte pranuar ligjin e ri, por sprova e radhës, dhe më e rëndësishmja, mbetet Strasburgu. Mbetet për t’u parë vlerësimi që kjo gjykatë do të japë për skemën e re. Në fund të muajit janar, Avokatura e Shtetit dërgoi në këtë gjykatë paketën e plotë ligjore “Për trajtimin e pronës dhe përfundimin e procesit të kompensimit”.
Deri më tani nuk ka sinjale lidhur me qëndrimin e mbajtur nga Strasburgu. Që në projektim të draftit të ri të pronave, qeveria Rama ka synuar që nëpërmjet formulës së re të mundësonte kthimin për shqyrtim në vendin tonë të të gjitha dosjeve që presin të gjykohen në Gjykatën Ndërkombëtare për të Drejtat e Njeriut.
