Qeveria do të japë administrimin e TVSH me koncension të formës Partneritet- Publik Privat. Lajmin e dha sot ministri i Financave, Shkëlqim Cani në një takim informal me gazetarët.
Me tej, zv ministria e Financave Irena Beqiraj ka shpjeguar se koncesioni do të jepet me garë të hapur dhe ka qellim përmirësimin e procedurës se mbledhjes së tatimit. Ajo pohoi se ka nje propozim të pakërkuar nga kompania MPOS, por do të hapet tender, i cili do të shpallet në Financial Times.
Koncensioni do të jepet për një periudhë dhjetë vjecare. Investimi i projektit është 9.57 mln euro ndërsa u bë e ditur se kosto e operimit do të jetë 8.2 mln euro. Në 10 vjet llogaritet një kosto totale prej 91 milionë euro.
Qëllimi është gjurmimi i zinxhirit të TVSH dhe përmirësimi i grumbullimit.
Zyrtarët e Ministrisë së Financave pohuan se ky vendim u mor pas aksionit antiinformalitet ku u panë probleme me indetifikimin e transaksioneve, falsifikim kuponash dhe mosgjurmim i mallrave në dogana, prandaj lindi edhe ideja për koncesionin e TVSH-së.
Por dhënia e TVSH me koncesion është një projekt i vjetër i qeverisë shqiptare. Më herët, Ministria e Financave kishte pranuar zyrarisht se po punon me një propozim të pakërkuar (koncesion) për lotarinë tatimore.
Në memon, që vlerëson ecurinë të vlerësuar propozimin e pakërkuar për “Sistemin e zgjerimit të mbledhjes së tatimit mbi vlerën e shtuar” drejtuar Ministrit të Financave, Shkëlqim Cani, sqarohet që në fillim që ka një paqartësi për ngritjen e komisionit për vlerësim, nëse duhet të ngrihet apo jo edhe për ato të pakërkuara, kush janë funksionet e komisionit, si do të jetë përbërja e tij, a bën ky komision edhe studimit, që duhet kryer për 90 ditë.
Beqiraj tha se koncesioni lufton evazionin dhe nuk lejon manipulim të dhënash. Ajo shpjegoi se sistemi i ri do të instalojë faturën elektronike dhe raportimin në kohë të çdo transaksioni të mallrave dhe shërbimeve . Gjithashtu koncesioni do të konfigurojë elektronikisht shorteun e kuponit tatimor.
Sistemi i ri nuk do të lejojë furnizimin pa faturë edhe në tregun e karburanteve sepse nuk i pranon transaksionet me gabim. Me këtë rast do të krijohet harta e dixhitale e regjistrave fiskale dhe sistemi do të përmirësojë analizën e riskut. Investimi i koncesionarit do të jetë 9.57 mln euro.
Koncesioni nuk ka tarifa mbi publikun si të tjerët, por do jetë në bazë të performancës, pohuan zyrtarët e Financave. Koncensionari nuk shperblehet, por nëse mbledh më shumë se 11 % merr, sipas një shkalle progresive në ulje, fitimin e tij, sipas një formule, që është shpallur te dokumentet e tenderit ndërkombëtar.
Nëse nuk arrin shifrën 11 % në vit rritje të TVSH, atëhere i paguhet 1/10 e investimit të bërë.
TVSH sjell minimum 1 miliard euro të ardhura në buxhet në vit.
/revista ekonomike Monitor/
