Pas prezantimit të Qeverisë Rama II, ka reaguar kreu i Opozitës Lulzim Basha. Basha i ka quajtur emrat e rinj një vazhdim i së keqesë. Sipas Bashës këta emra janë garancia e provuar për korrupsionin dhe krimin.
Basha ka theksuar se me vendosjen e Ruccit në krye të Kuvendit dhe Fatmir Xhafës në krye të Ministrisë së Brendshme, Shqipëria drejtohet nga disa nga figurat komuniste ose pinjollët e tyre. Duke e quajtur treshen Rama- Ruçi –Xhafa figurat famkeqe.
Reagimi i plote i Bashes
Asgjë e re, vazhdim dhe thellim i së keqes. Kjo është qeveria e thellimit të korrupsionit dhe të krimit. Jo vetëm Edi Rama, por edhe Fatmir Xhafa, Arben Ahmetaj, Damian Gjiknuri e pothuajse të gjithë ministrat e tjerë janë garancia e provuar për korrupsionin dhe krimin.
Kjo është qeveria e konsolidimit të rikthimit në pushtet të elitës komuniste. Tridhjetë vjet pas rënies së komunizmit, Shqipëria sot drejtohet nga disa nga figurat famëkeqe komuniste ose pinjollët e tyre nga Edi Rama tek Gramoz Ruçi, Fatmir Xhafaj, Bushati e Qato e qindra të tjerë në poste kyçe qeverisëse.
Kjo është qeveria e thellimit të sundimit privat të Edi Ramës dhe një grushti njerëzish. Kush mendoi se “takimet me popullin” dhe ballafaqimi me hallet e rënduara të njerëzve e bënë Edi Ramën të reflektojë, sot kuptoi që kjo qeveri nuk do jetë kurrë qeveria e popullit dhe nuk do punojë kurrë për popullin.
Opozita ka detyrën dhe përgjegjësinë që bashkë me qytetarët të mos lejojë të shkojë deri në fund ky projekt i zi për vendin tonë. /opinion.al
