Kryeministri i Kosovës Albin Kurti dhe ministrja e Drejtësisë Albulena Haxhiu kanë dorëzuar në Kuvendin e Kosovës dosjen për vetingun në drejtësi.
Ata u pritën nga kryetari i Kuvendit, Glauk Konjufca. Kurti dhe Haxhiu bënë të ditur sot në një konferencë për media se do dorëzojnë në Kuvend dosjen, ndërsa nuk munguan kritikat për punën e Prokurisë dhe gGykatës pas rastit të dhunimit të 11-vjeçares.
Sakaq, kryetari i Kuvendit të Kosovës, Glauk Konjufca, ka njoftuar se ka pranuar dokumentet përkatëse.
“Procesi gjithëpërfshirës i Vettingut, siç e kemi theksuar njëzëri, është një reformë e domosdoshme për sundimin e ligjit. Kjo është po ashtu një kërkesë shoqërore e kamotshme për Kosovën”.
“Krijimi, votimi dhe implementimi i tij është një hap jetik për mbarëvajtjen e shtetit dhe njëra nga reformat më të rëndësishme në sistemin e drejtësisë që e ngrit efikasitetin dhe profesionalizmin. Si i tillë, procesi i Vettingut do ta forcojë sistemin e drejtësisë, i cili ndikon drejtpërdrejt në përmirësimin e jetës së qytetarëve të Republikës së Kosovës”,-ka shkruar Konjufca./Opinion.al
