Qeveria britanike do t’i kërkojë Mbretëreshës tw pezullojë Parlamentin vetëm disa ditë pasi deputetët të kthehen në punë në shtator dhe vetëm disa javë para afatit të Brexit.
Redaktorja politike e BBC, Laura Kuenssberg thotë se do t’i hapë rrugë administratës së re të Boris Johnson për të mbajtur Fjalimin e Mbretëreshës ku do të shpalosë planet e qeverisë më 14 tetor.
Por kjo do të thotë që deputetët nuk do të kenë kohë të miratojnë ndonjë ligj që mund të ndalojë kryeministrin të nxjerrë Britaninë e Madhe nga BE pa një marrëveshje më 31 tetor.
Dominic Grieve e quajti këtë “një akt të tmerrshëm” dhe paralajmëroi se mund të çojë në një votë mosbesimi tek Z. Johnson, duke shtuar: “Kjo qeveri do të bjerë”.
Por një burim tjetër e mbrojti këtë veprim, duke thënë se “është koha që një qeveri e re dhe Kryeministri i ri të përcaktojnë një plan për vendin pasi të largohemi nga BE”.
Ideja e mbylljes së Parlamentit ka shkaktuar polemika, ndërsa kritikët thonë se kjo do t’i ndalojë deputetët të jenë në gjendje të marrin pjesë në mënyrë demokratike në procesin e Brexit.
Laura Kuenssberg tha që vetëm një numër i vogël i ministrave të qeverisë kishin dijeni për planin para shpalljes së tij sepse kjo do të shkaktonte në mënyrë të pashmangshme një mosmarrëveshje të madhe.
Ajo tha se qeveria do të argumentojë se është “një proces standard i Fjalimit të Mbretëreshës”, pavarësisht gjithë zhurmën që është ngritur përreth. /Opinion.al
