Të mbijetuarit e zjarrit që përfshiu kullën 24-katëshe në Londër javën e kaluar, do të dëmshpërblehen nga qeveria me disa shtëpi luksoze në zemër të Kensingtonit. Qeveria ka blerë 68 apartamente luksoze ku do të strehohen të gjithë ata që mbetën pa shtëpi nga kjo tragjedi. Këto apartamente të sapondërtuara ndodhen në një zonë ku shtëpitë private nisin nga 1.5 milion funte. Të paktën 79 banorë humbën jetën dhe shumë të tjerë mbetën të pastrehë pasi zjarri përfshiu bllokun rezidencial në perëndim të Londrës një javë më parë.
Dy ditë më parë komandanti i zjarrfikësve njoftoi hapur se numri i viktimave do të ishte i frikshëm dhe mund të arrinte deri në 150 persona.
Operacioni i rimëkëmbjes në bllokun e djegur të banesave ka rifilluar dhe mund të duhen disa javë për të zbardhur detajet e plota të ngjarjes.
Ndërkohë, Kryeministria Theresa May pranoi se mbështetja për familjet e kullës në “orët e para të tragjedisë” nuk ishte “mjaft e mirë”.
Deklarata erdhi pasi May u takua me vullnetarët që po ndihmojnë viktimat dhe disa prej banorëve tashmë të pastrehë.
