Në Berlin ka patur reagime të ndryshme nga forcat politike, në lidhje me vendimin ndaj Shqipërisë dhe Maqedonsë së Veriut sa i përket negociatave. Partia më e madhe qeverisëse në Gjermani, CDU-CSU, në një njoftim zyrtar të saj ka sqaruar vendimin e marrë nga dy grupet kryesore parlamentare në Bundestagun Gjerman.
Deklarata qartëson se për Maqedoninë e Veriut është autorizuar Qeveria që të nise negociatat për në BE, ndërsa për Shqipërinë është rekomanduar hapja në parim e bisedimeve, por janë vendosur kushte të rrepta.
“Ne kërkojmë për Shqipërinë kritere shumë më të rrepta se me Maqedoninë e Veriut: funksionimi dhe efikasiteti i sistemit të drejtësisë duhet të rivendoset dhe duhet miratuar vendimi për reformën zgjedhore. Deri në hapjen e vërtetë të kapitujve, duhen përmbushur kushte të tjera, siç është fillimi i procedurave kundër gjyqtarëve dhe prokurorëve të korruptuar. Prandaj në negociata, kapitujt që do hapen të parët dhe të mbyllen së fundmi do lidhen me sundimin e ligjit dhe drejtësinë”, sqarohet në deklaratën zyrtare të Grupit Parlamentar CDU/CSU.
“Është një sinjal i rëndësishëm për integrimin europian të të gjithë rajonit, që grupet parlamentare të koalicionit e hapën rrugën për fillimin e negociatave të anëtarësimit në BE me Shqipërinë dhe Maqedoninë e Veriut“, ka thënë nga ana tjetër deputetja socialdemokrate, Nezahat Baradari në një deklaratë për Deutsche Wellen.
Të enjten Bundestagu do të japë përfundimisht dritën e gjelbër për këtë, thekson Baradari. Por deputetja gjermane e vë theksin tek vazhdimi i reformave. “Të dyja vendet duhet tani të vazhdojnë pa ndryshuar përpjekjet për reforma. Së bashku me partnerët tanë europianë ne do ta ndjekim këtë proces në mënyrë intensive dhe në rast nevoje do të kërkojmë përpjekje të tjera.”
“Ne, Të Gjelbrit, do ta miratojmë çeljen e negociatave të anëtarësimit të Maqedonisë së Veriut dhe Shqipërisë në BE. Ky vendim vjen i vonuar dhe u vonua vetëm për shkak të taktikës së zvarritjes të disa pjesëve të grupit parlamentar CDU / CSU. Të dy vendet i kanë përmbushur mjaftueshëm kushtet. BE-ja tani duhet të tregojë se është një partner i besueshëm dhe të hapë bisedimet e anëtarësimit në BE”, shprehet eksperti i Evropës Juglindore të Të Gjelbërve, Manuel Sarrazin në një deklaratë për Deutsche Welle-n.
Më tej ai shton, se “kushtet shtesë të formuluara nga koalicioni për Shqipërinë e tejkalojnë objektivin. Është e papranueshme që Shqipëria çdo vit të duhet të përmbushë kushte të reja për negociatat e anëtarësimit në BE. Kjo nuk është vetëm e padrejtë, por edhe e padenjë për një bashkëekzistencë evropiane,” – përmbyll Sarrazin deklaratën për DW./ Opinion.al
