Një 29-vjeçar është qëlluar me armë zjarri në këmbë, mbrëmjen e djeshme te Rruga e Dibrës në Tiranë.
Sipas uniformave blu mësohet se ngjarja ka ndodhur pas një konflikti për motive të dobëta.
Policia njofton se është identifikuar dhe shpallur në kërkim autori, ndërsa 29-vjeçari është jashtë rrezikut për jetën.
“Specialistët e Sektorit për Krimet e Rënda, në bashkëpunim me shërbimet e Komisariatit të Policisë Nr. 4, pas marrjes së njoftimit, mbrëmjen e djeshme, se në Rrugën e Dibrës ishte plagosur me armë zjarri një shtetas, kanë shkuar menjëherë në vendin e ngjarjes.
Si rezultat i veprimeve të shpejta hetimore, u identifikua dhe u shpall në kërkim shtetasi F. C., 32 vjeç, i cili dyshohet se, gjatë një konflikti për motive të dobëta me shtetasin G. H, 29 vjeç, e ka qëlluar këtë të fundit në këmbë, me armë zjarri. Shtetasi G. H. mori ndihmë mjekësore dhe ndodhet jashtë rrezikut për jetën”, njofton Policia.
