Presidenti rus Vladimir Putin ka pranuar një ftesë për të vizituar Korenë e Veriut, raportojnë mediat e huaja.
Ftesa erdhi nga udhëheqësi i Koresë së Veriut Kim Jong Un gjatë bisedimeve me Putinin në Forumin Ekonomik Lindor në Vladivostok.
“Putini e pranoi ftesën me kënaqësi dhe ripohoi vullnetin e tij për të çuar përpara historinë dhe traditën e miqësisë Rusi-DPRK”, tha KCNA, agjencia e lajmeve.
Më herët, të mërkurën, Kim u zotua për “mbështetje të plotë dhe të pakushtëzuar” të Phenianit për pushtimin rus të Ukrainës.
Media shtetërore e Koresë së Veriut tha se të dy liderët ishin angazhuar për një “front të përbashkët për të frustruar kërcënimin dhe provokimin ushtarak të imperialistëve”.
Vëzhguesit dhe zyrtarët amerikanë besojnë se Putini po kërkon municion dhe raketa nga rezervat e bollshme të Koresë së Veriut.
James O’Brien, kreu i Zyrës së Koordinimit të Sanksioneve në Departamentin e Shtetit të SHBA-së, tha se Rusia “po gërvishtte fundin e fuçisë duke kërkuar ndihmë sepse ka probleme për të mbajtur ushtrinë e saj”.
Putin mohoi se ai po shkelte sanksionet që ndalojnë blerjen e armëve nga Koreja e Veriut.
Takimi 4-orarsh i Kim dhe Putin u mbajt në Kozmodromin Vostochny, pikënisja më e rëndësishme në tokën ruse.
Kim thuhet se po kërkon ndihmën e Rusisë në zhvillimin e satelitëve ushtarakë të zbulimit. Vendi i Koresë së Veriut deri më tani ka dështuar në përpjekjet e tij për të lëshuar një satelit në orbitë.
Ndërkohë, Japonia të enjten paralajmëroi kundër shkeljes së rezolutave të OKB-së për marrëveshjet e armëve me Korenë e Veriut, pasi Putin u takua me Kim./Opinion.al
