Vladimir Putin e ka hedhur vështrimin nga Deti Baltik. Ky është paralajmërimi i frikshëm që vjen nga gjenerali i ushtrisë suedeze, Micael Byden. Në një prononcim për mediat gjermane, komandanti i përgjithshëm i forcave të armatosura suedeze ka theksuar se Presidenti Vladimir Putin dëshiron të kontrollojë Detin Baltik dhe “i ka të dy sytë” në ishullin e rëndësishëm strategjik të Gotlandit.
“Kushdo që kontrollon Gotlandin, kontrollon Detin Baltik. Për momentin, jemi ne. Ne mbrojmë Gotlandin dhe gjithashtu mund ta përdorim ishullin për operacione sulmuese nëse është e nevojshme. Ne kemi një interes të madh për të mbajtur të hapur rrugën detare dhe për të kontrolluar atë që ndodh mbi dhe nën sipërfaqe”, tha Byden.
Ishulli është po aq i rëndësishëm për pjesën tjetër të NATO-s sa është për Suedinë, sepse kapja e tij do t’i jepte Rusisë një bazë për sistemet kundërajrore për të mbështetur një sulm ndaj shteteve baltike.
“Nga Gotland, ne mund të ndihmojmë shtetet e tjera të NATO-s në Detin Baltik që të jetojnë të sigurt. Por, nëse Putin pushton Gotlandin, ai mund të kërcënojë vendet e NATO-s nga deti. Ky do të ishte fundi i paqes dhe stabilitetit në rajonet nordike dhe baltike. Jam i sigurt se Putini i ka të dy sytë te Gotland. Qëllimi i Putinit është të fitojë kontrollin e Detit Baltik”, deklaroi Byden.
Putin gjithashtu ka të ngjarë, sipas Byden, të jetë duke vëzhguar nga afër Ishujt Aland, një rajon autonom i Finlandës që ndodhet midis Finlandës dhe Suedisë. Byden paralajmëroi se flota ruse e cisternave të vjetra të naftës në Baltik përbënte një kërcënim potencialisht shkatërrues mjedisor.
Pas dy shekujsh neutraliteti, Suedia u bashkua me NATO- n në mars të vitit 2024 në përgjigje të pushtimit të plotë të Ukrainës nga Rusia dhe kreu stërvitje ushtarake në Gotland muajin e kaluar.
