Presidenti rus, Vladimir Putin ka ndërmend të çimentojë pozicionin e tij në krye të shtetit përtej afatit që i lejon kushtetuta aktuale.
Putin ka dominuar skenën politike në Rusi për 20 vitet e fundit dhe i tillë ka qenë impakti i tij në arenën botërore. Por mesa duket shefi i Kremlinit ka menduar si të jetë akoma në pushtet edhe në dekadën e ardhshme.
Presidentit rus i kërkohet nga kushtetuta që të tërhiqet në vitin 2024. Prej muajsh ka patur hamendësime se si ai mund të qëndronte në pushtet përtej kësaj kohe, ose të paktën të sigurojë një tranzicion të sigurt për veten e tij.
Përgjigjen mesa duket e ka dhënë vetë ai nëpërmjet Parlamentit në Rusi. Deputetja ruse Valentina Tereshkova ka propozuar një ndryshim kushtetues që që presidentit Putin t’ i rinovohet mundësia për t’u kandiduar edhe për dy mandate të tjera, deri në 2036.
Ajo ka argumentuar se ndryshimet që po mendohen prej kohësh në Parlament për të ndryshuar kushtetutën sjellin gjithashtu edhe zhbërjen e rregullave të vjetra.
Sipas saj, një kushtetutë e re do të kthejë në gjendjen zero statusin e mandateve të presidentit Putin duke i lejuar atij të rikandidojë sërish. Megjithatë nëse zbatohet ‘rokada’ të cilën ai zbatoi me Medvedev ku për një mandat ata i shkëmbyen vendin njëri tjetrit Putin mund të mbyllte karrierën e tij edhe në vitin 2048, në moshën 95 vjeçare.
Putin më pas njoftoi se do të vinte personalisht për t’iu drejtuar parlamentit,.
“Në parim, ky opsion do të ishte i mundur,” tha ai në fund të një fjalimi gjysmë ore. “Por me një kusht, nëse gjykata kushtetuese jep një vendim zyrtar se një ndryshim i tillë nuk do të kundërshtonte parimet dhe dispozitat kryesore të kushtetutës.”
Ai gjithashtu tha se masa do të duhej të aprovohej nga publiku në një referendum muajin e ardhshëm. /Opinion.al
