Një punonjës 44 vjeç humbi jetën ditën e djeshme, pasi ra nga kati i pestë i një pallati në ndërtim.
Ngjarja ka ndodhur në qytetin e Bajram Currit.
Viktima me iniciale A. S., banues në fshatin Gri, raportohet se ka qenë duke punuar në momentin që ka rënë nga kati i 5-të i objektit dhe si pasojë e dëmtimeve të marra ka humbur jetën.
Pas ngjarjes, policia ka arrestuar drejtuesin teknik, 40 vjeçari me iniciale M. Ç.,banues në Tiranë, për veprën penale “Shkelja e rregullave të mbrojtjes në punë”.
Njoftimi i policisë:
“Specialistët për Hetimin e Krimeve të Komisariatit të Policisë Tropojë, bënë ndalimin e shtetasit M. Ç., 40 vjeç, banues në Tiranë, me detyrë drejtues teknik i një subjekti për ndërtim pallati, për veprën penale ‘Shkelja e rregullave të mbrojtjes në punë’.
Ky shtetas dyshohet se nuk ka marrë masat për zbatimin e rregullave të mbrojtjes në punë në ndërtimin e një pallati në qytetin e Bajram Currit.
Ditën e djeshme, gjatë punës në këtë objekt është rrëzuar nga kati i pestë, shtetasi A. S., 44 vjeç, banues në fshatin Gri, i cili si pasojë e dëmtimeve të marra ka humbur jetën.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme,” njofton policia.
