Pas lënies së Shullazit në arrest me burg nga Gjykata e Krimeve të Rënda, Prokuroria po vazhdon hetimet ndaj tij për katër gjobëvënie.
Grupi i hetimit ka ftuar për të dhënë deklarime dy biznesmenë nga Durrësi dhe një sipërmarrës karburantesh në Tiranë. Prokuroria nuk sqaroi nëse tre biznesmenëve në fjalë u ka dërguar thirrje me shkrim apo i ka ftuar përmes kontaktit verbal të hetuesve.
Ajo çka bie në sy, sipas organit të akuzës, është se tre biznesmenët kanë refuzuar deri tani të paraqiten në Prokurori për të bërë kallëzim apo për të dhënë deklarime në lidhje me Emiljano Shullazin, shkruan sot Panorama.
Shërbimi Informativ dhe Prokuroria kanë siguruar raporte vëzhgimi dhe përgjime telefonike e ambientale, sipas të cilave këtyre tre biznesmenëve, bashkë me Jani Zakën, u janë kërkuar pasuri apo shuma monetare nga Emiljano Shullazi, 38 vjeç, Gilmando Dani, 38 vjeç, dhe Blerim Shullazi, 32 vjeç.
Në shkurt 2016, në Polici dhe Prokurori ishte paraqitur e kishte bërë denoncim biznesmeni Jani Zaka, sipas të cilit Shullazi po i kërkonte një parking 1200 m² te “21 Dhjetori”.
Prokuroria ka kërkuar edhe dëshminë e Jani Zakës, por ai rezulton të jetë larguar nga Shqipëria në javën e parë të shkurtit dhe nuk është kthyer më në Tiranë.
