Kryeministri Edi Rama, ka zbuluar sot, pjesë nga bisedat që ai zhvillonte shpesh me mikun e tij Ardian Klosi. Në një takim për nder të ndarjes së çmimit “Ardian Klosi” për letërsinë si dhe të promovimit të një libri “Për Ardian Klosin, Gjermania nga Shqipëria”, Rama ka rrëfyer se kishte qenë ai që ia kishte “paralajmëruar” mënyrën e vdekjes mikut të tij.
“Gjithmonë i thosha Ardian Klosit ‘ti do vrasësh veten’. Kur ai ishte duke ndërtuar shtëpinë e tij të re, kishte edhe një papafingo. Zakonisht kur shkoja atje shkoja në muzg, kur ishte edhe një qetësi e jashtëzakonshme.
‘Këtu lart do ndihet një krisëm e thatë, pastaj dy rosa në liqen dhe pasqyrimi i vdekjes tënde’. Ai iku, duke mos na thënë lamutimirë, por na tha ‘ik pirdhuni’”,- u shpreh më tej Edi Rama.
Sot në mbrëmje COD (Qendra për Hapje e Dialog në Kryeministri), u promovua libri “Për Ardian Klosin, gjermanin nga Shqipëria”, një botim i shtëpisë botuese “Fjala publishing”, përgatitur nga historiani dhe miku i tij, Oliver Jens Schmitt.
Deklaratat e plota të Ramës për Klosin
– “Arsyeja pse përkthente ishte nevoja për higjienë. Nëse nuk do kishte atë trazim të madh që i vinte së brendshmi por që agravohej nga injoranca dhe pisllëku nuk do kishte përkthyer. Për shkak të nevojës për të bashkëjetuar, pra përkthimi ishte mundësi për të bashkëjetuar në një shoqëri me të tjerë që i zgjidhte vetë, komunikonte me ta ishte një lloj rruge në arrati, ashtu sikurse ishte një lloj flirti me të vdekurit”.
-“Vdekja ishte një fuqi që tek Ardiani vepronte në mënyrë të pavetëdijshme, e kishte me vete, nuk e shmangte atë. Në flirt me të vdekurit që i zgjidhte vetë trazimi i tij rritej, mendja e mprehtë që kishte ia rëndonte trazimin”.
“I përkiste një lloj shkolle që nuk e pranonte intelektualin si koncept jashtë angazhimit. Për Ardianin intelektuali ishte ai që rron me të vërtetën”.
“Gjithmonë ia thosha që do përfundosh duke vrarë veten dhe pasonte e qeshura… Kur ndërtonte shtëpinë tek liqeni, thoshte do bej papafingo lart. Kur shkoja ta takoja ndonjë natë, i thosha pak a shumë në këtë orë këtu lart dondjehet një krismë e thatë …i madhi Ardian Klosi nuk na tha Lamtumirë por na tha “Ik pirdhuni”!
