Gjendesh në një situatë ku duhet të festosh, por ndjen se nuk e ke merituar plotësisht atë çfarë ke arritur. Në këtë konkluzion shpesh dalim kur përjetojmë emocione të ndryshme në situata të cilat ndikojnë menjëherë në gjendjen emocionale, aq sa suksesin dhe dështimin mund t’i ndajë një fije fare e vogël.
Të tilla emocione na befasojnë, duke bërë që herë pas here të krijojmë konfuzione nëse gjërat po shkojnë ose jo siç duhet.
Kjo situatë e sikletshme, mund të gjejë zbatim dhe në çastet kur ia kemi dalë të arrijmë një sukses, por thellë brenda vetes gjykojmë se s’kemi bërë mjaftueshëm duke fajësuar veten për këtë mungesë shpirtërore.
Pse ndihemi fajtorë, kur në fakt duhet të gëzojmë?
Psyschcentral argumenton se një faktor i tillë emocional lidhet ngushtësisht me pritshmëritë e brendshme, ndryshe e quajtur ego. Është kjo ndjesi që reflekton tek ne, duke hamendësuar se në njëfarë mënyre diçka nuk shkon ose nuk kemi arritur të përmbushim pritshmëritë në sasinë e planifikuar.
Me fjalë të tjera, kur vetëkritika hyn në lojë, ndjesia e vetëpërmbushjes bëhet më e komplikuar pasi kërkojmë vazhdimisht të nxisim veten drejt më të mirës.
Komplesi i fajësisë dhe vetëvlerësimi
Jemi në qiellin e shtatë dhe befas kuptojmë se diçka na mungon, duke minuar “festën e përkohshme”.
Një tjetër aspekt që psikologët mendojnë se lidhet ngushtë me këtë ndjesi, është dhe fakti se në krahasim me persona të tjerë që nuk kanë përjetuar të njëjtat ndjesi si ne, mund të reflektojë në gjendjen emocionale duke u ndjerë “fajtorë”.
“Ndihem keq se jeta ime po shkon kaq mirë ndërkohë që të tjerët po luftojnë akoma”, janë mendime që përcillen vazhdimisht.
Roli i ankthit dhe mendimet e tepërta
Është ndjesi e çuditshme, por shpesh faji mund të ngatërrohet me përjetimin e ankthit. Gjithçka nis me dilemat të cilat na mundojnë gjatë gjithë kohës për atë çfarë kemi arritur me sukses.
Kjo sipas një studimi në Bibliotekën Kombëtare të Mjekësisë, mendimet e tepërta shkaktojnë ngarkesë emocionale, përfshi këtu dhe ndjeshmërinë ndaj të qenit fajtor edhe kur rrethanat në të cilat ndodhesh janë vërtetë të favorshme.
Praktika e mirënjohjes
Mund ta quani virtytin më të mirë njerëzor, por shpesh mund t’u kthehet njerëzve dhe si një qortim.
“Ji mirënjohës që e ke, sepse të tjerët janë në një situatë më të keqe se ty”, janë fjalë që shpesh dëgjojmë. Megjithatë, psikologët janë të mendimit se mirënjohja mund të funksionojë akoma më mirë në këtë mënyrë.
Thoni kështu: “Jam mirënjohës për atë që kam dhe e pranoj se kjo s’më bën as më të mirë dhe as më të keq se të tjerët”.
Produktiviteti
Jeta po shkon vërtet mirë, por ndjeni njëfarë ndjesie shtytëse që ju nxit të kërkoni më shumë nga vetja e të bëni më shumë.
Në vend që të pushoni pasi keni arritur diçka në jetë, çfarëdo qoftë, ju sërish ngurroni që të merrni një ditë ‘të merituar’ pushimi dhe filloni për planet e radhës, sidomos për të zgjidhur të tjera probleme që kanë mbetur në pritje.
Jeni më të dhembshur
Fakti që mund të jeni empatikë si natyrë mund të ndihmojë shumë që të ‘kujdeseni’ dhe për të tjerët, edhe nëse në anën tuaj gjërat po shkojnë vërtetë mirë, duke treguar një anë tjetër të mirë njerëzore tuajën.
Psikologët e quajnë “dhembshuri” me idenë se përpjekjet për të ndihmuar dikë të dalë nga vështirësitë që po kalon, nuk e “prek” lumturinë tonë.
Ata mendojnë se lumturia është koncept i pacënueshëm dhe këto ndjeshmëri bashkëjetojnë mes individësh, aq sa lumturia e dikujt s’mund të ulë vlerën e dikujt tjetër.
