LSI ka marrë si rrallëherë një vendim të fortë në parti. Ka vendosur të përjashtojë një deputet. Ai është Përparim Spahiu. Ky përjashtim vjen në kohën kur mazhoranca zotohet se do të votojë reformën në drejtësi. Ndërsa flitet për blerje votash për të bërë 94 të tilla, LSI vendos të largojë një deputet të sajin.
A është ky një vendim tejet i ashpër për Spahiun? Apo bojkon LSI në këtë mënyrë të heshtur reformën? Të gjitha këto janë pikëpyetje që shtrohen sot, kur LSI bën një lëvizje befasuese…
Masa ndëshkuese ndaj Përparim Spahiut u mor një ditë pasi ai shkroi në Twitter kundër monitorimit nga ndërkombëtaret të procesit të “Vetingut”.
“E kuptoj dhe jam dakord që sovranitetin e vendit tonë të përbashkët duhet ta ndajmë me NATO, me Komisionin Europian dhe shpresoj edhe me Bashkimin Europian. Por nuk jam gati të votoj ndarjen e sovranitetit me Operacionin Ndërkombëtar të Monitorimit. Çfarë përfaqësojnë këta?!” kishte shkruar Spahiu në rrjetin social Twitter.
Me këtë vendim mazhoranca që ka 86 mandate, humbet një të tillë, pra mbetet me 85 vota.
