Pak ditë më parë, kryeministri Edi Rama dhe homologia e tij italiane, Meloni nënshkruan një marrëveshje për ngritjen e një kampi refugjatësh në vendin tonë.
Për këtë marrëveshje, kreu i qeverisë ka zhvilluar një intervistë për gazetën italiane “La Repubblica”. I pyetur nga gazetari, se cili është interesi i Shqipërisë në këtë pakt, Rama zgjodhi të sillte në vëmendje pritjen e emigrantëve shqiptarë nga Italia pas rrëzimit të sistemit komunist.
“Unë përgjigjem me një pyetje retorike. Kush ishte interesi i Italisë që të na pranonte ne në momentin kur ne ia mbathnim nga ferri kur ra regjimi komunist. Ku ishte interesi i Italisë që ka qenë një ndihmë e madhe këtu në Shqipëri. Ose kur çoi skuadrën e saj për të shpëtuar jetë kur ndodhi tërmeti i para disa viteve këtu. Për ne, Italia është speciale, nuk ka një interes direkt, nga pikëpamja materiale, nuk përfitojmë asgjë, ne i japim disponibilitetin territorial dhe Italia merret me gjithë procedurat operacionale,-tha Rama.
Rama u kujdes të theksonte se kërkesa për të pritur emigrantët i është bërë edhe nga vende të tjera të Bashkimit Evropian, por Shqipëria i ka refuzuar ato gjithnjë.
Edi Rama: Gjatë këtyre viteve ne kemi patur kërkesa të tilla edhe nga vende të tjera europiane, por kemi thënë gjithmonë jo.
Gazetari: Nga Franca, Spanja, Gjermania?
Edi Rama: Nuk po përmend asnjë, sepse nuk do ishte e drejtë.
Socialistët kanë dhënë të njëjtën përgjigje sikurse Rama për arsyen e pranimit të emigrantëve, duke theksuar se dhe shqiptarët janë ndihmuar nga Italia në vitet ’90. Kjo marrëveshje është kundërshtuar nga opozita, e cila e cilëson një rrezik për sigurinë e vendit./Opinion.al
