Dorëheqje më 2005, dorëheqje më 2019. Është ky Ramush Haradinaj, i cili për të dytën herë lë postin e kryeministrit të Kosovës, për të njëjtën arsye si në atë kohë.
Më 2005 i kishte ardhur një ftesë nga Tribunali i Hagës dhe tani një ftesë nga Gjykata Speciale, në të dy herët si i dyshuar për krime të mundshme gjatë luftës së fundit në Kosovë.
Haradinaj atë kohë për dorëheqjen e kishte njoftuar Ibrahim Rugovën, presidentin historik. Sot ka vepruar ndryshe, dorëheqjen e bëri para kabinetit qeveritar, dhe për atë se njoftoi presidentin Hashim Thaçi.
Ndonëse nuk e njoftoi presidentin, atë e përmendi kur foli për zgjedhjet e parakohshme. Tha se atij i mbetët ta caktojë datën e zgjedhjeve. Sipas ligjeve të Kosovës, zgjedhjet e Parakohshme zhvillohen jo më herët se 30 ditë, jo më vonë se 45 ditë
Thaçi reagoi menjëherë, duke thënë se do të veprojë bazuar në kompetencat e tij kushtetuese dhe ligjore.
“Nga mediat tani u informova edhe për vendimin e Kryeministrit të Republikës së Kosovës, Ramush Haradinaj, për dorëheqjen e parevokueshme nga pozita e tij”, shkruan Thaçi në Facebook.
Në fillim të muajit gusht të vitit 2015, parlamenti i Kosovës miratoi me shumicë votash ligjin për Gjykatën e Posaçme, që me emrat dhomat e specializuara, do të veprojë në Hagë, nën ligjet e Kosovës dhe me prokurorë e gjykatës ndërkombëtarë.
Ideja për themelimin e gjykatës pasoi hetimet e pretendimeve të të dërguarit të Këshillit të Evropës Dick Martty për trafikim organesh në Kosovë, përkatësisht përfshirjen e disa prej ish-drejtuesve të Ushtrisë Çlirimtare të Kosovës, në krime të luftës.
Hetimet kishin nxitur reagime dhe protesta ne Kosovë, ku pohohet se në këtë mënyrë po bëhet barazimi me mizoritë e forcave serbe gjatë luftës së viteve 1998-1999 që mori fund me ndërhyrjen e NATO-s./ Opinion.al
