TIRANË- Bujar Leskaj, kryetar i KLSH i ka kërkuar Kryeministrit Edi Rama të shkarkojë drejtoreshën e Shërbimeve Qeveritare, Kamela Vojka. Ai thotë se shkresa është prej një muaji në zyrën e Kryeministrit.
“Kjo kërkesë është bërë rreth 1 muaj më parë dhe është motivuar nga auditi i kryer në Drejtorinë e Shërbimeve Qeveritare, ku janë konstatuar shkelje të ndryshme. Ne nuk kemi bërë kallëzim penal për drejtoreshën, por është vënë në dijeni kryeministri nëpërmjet letrës zyrtare”, tha ai.
Një nder shkeljet e evidentuara për të cilat është kërkuar shkarkimi i drejtoreshës Kamela Vojka është dhe fakti se nuk vuri në dispozicion të Presidentit Bujar Nishani vilën e Dhërmiut për pushimet verore.
“Argumenti se ishin duke u kryer punime në vilë, nuk qëndron pasi ne konstatuam se nuk ishin duke u bërë punime në atë periudhë”, tha Leskaj.
Pas auditit KLSH ka konstatuar se informacioni i përcjellë në persidencë përsa i përket mosvënies në dispozicion të vilës qeveritare ka qenë i pavërtetë.
Auditi është realizuar në Drejtorinë e Shërbimeve Qeveritare për periudhën nga 1 janari 2014 deri në 31 korrik 2015 dhe janë konstatuar disa shkelje, ndër të tjera se Drejtoria e Shërbimeve Qeveritare nuk ka zbatuar rregullat dhe procedurat ligjore edhe në realizimin e disa tenderave që ka hapur ky institucion.
