Armando Prenga nuk do të pezullohet me ligj, vendosën deputetët e mazhorancës në komisionn parlamentar të Ligjeve. Ata rrëzuan nismën e Partisë Demokratike, duke deklaruar se nuk miratojnë ligje për një deputet.
Prej rreth dy muajsh, që kur gjykata e la në gjendje të lirë, Armando Prenga po qëndron jashtë institucioneve parlamentare.
Pasi votoi një herë në Parlament, Prenga u “vetëpezullua” vullnetarisht, por ligjërisht mazhoranca në Komisionin Parlamenar të Ligjeve vendosi që të mos e pezullojë deputetin deri në një vendim gjykate.
Këtë masë demokratët e propozuan si ndryshim në ligjin për dekriminalizimin për funksionarët e lartë që arrestohen në flagrancë për vrasje apo plagosje.
Për nismën e opozitës relatoi deputetja socialiste, Vasilika Hysi. E shqetësuar mbi ligjin e dakordësuar dhe votuar konsensualisht më 17 dhjetor, ajo nuk mungoi të kërkojë ndjesë.
Ndjesa e zonjës Hysi u bashkohet qëndrimeve të Pandeli Majkos, kryeministrit Rama apo deputetit Koço Kokëdhima, sipas të cilëve një dërgim i ligjit në Gjykatë Kushtetuese do të sillte rrëzimin e tij.
Opozita braktisi komisionin kur mazhoranca rrëzoi thelbin e ligjit të saj. Deputetët e mbetur socialistë ngritën duart pro disa rregullimeve teknike për ligjin e dekriminalizimit. /abcnews
