Partia Socialiste ka mbledhur këtë mëngjes grupin parlamentar, para nisjes së seancës parlamentare. Në rendin e ditës të seancës pritet të futet kërkesa e Taulant Ballës për shtyrjen e Komisionit të Reformës Zgjedhore deri me 29 nëntor 2019.
Në shkresën drejtuar kryetarit të Kuvendit Gramoz Ruçi kërkohet që në objektin e punës së komisionit të Reformës Zgjedhore të shtohet dhe ndryshimi i sistemit zgjedhor. Një tjetër pikë është dhënia e së drejtës për rishikimin e kodit elektoral në disa faza.
Në seancën e sotme do të zhvillohet interpelanca me Ministrin e Brendshëm Sandër Lleshaj, e kërkuar nga deputetët e opozitës.
“Grupi i deputeteve kerkon sqarime per grabitjen e nje shume te konsiderueshme valute te huaj ne territorin e brendshem te aeroportit nderkombetar “Nene Tereza” me daten 9 prill 2019 […] Interpelanca do te parashtrohet nga deputeti Ralf Gjoni, ndersa zhvillimi i saj do te behet nga deputeti Myslim Murrizi”, thuhet në kërkesën për interpelancë të firmosur nga 11 deputetë opozitarë.
Ndërkohë jashtë Parlamentit, do të zhvillohet protesta e opozitës, që do të angazhojë forca të shumta të rendit, edhe pse me dimensione më të vogla se gjatë protestës kombëtare të 13 prillit./Opinion.al
