Partia Socialiste ditën e sotme shënon 34 vite nga lindja e saj. Ndaj këtë mëngjes ka ardhur një urim nga vetë kryesocialisti, njëherësh dhe kryeministër i Shqipërisë.
Përmes një postimi në rrjete sociale, Rama ndan foton e një trëndafili, simbolikë kjo e kësaj force politike, teksa e shoqëron me një urim për socialistët dhe falenderim për të gjithë ata që e kanë votuar.
Rama shkruan se flamuri i PS-së ka ardhur në ngjitje vetëm falë të gjitha atyre votave të marra, për Shqipërinë 2030 në BE, një aspiratë e kësaj force politike që të fusë vendin tonë në Unionin Evropian.
“MIRËMËNGJES dhe me këtë simbol të flamurit të socialistëve e progresistëve shqiptarë, që në këtë 34 vjetor të valëvitjes së tij është ngjitur më lart se asnjëherë falë 856 mijë e 177 zemrave, të cilat u bënë bashkë për Shqipërinë 2030 në BE, ju uroj gëzuar ditëlindjen e Partisë Socialiste të gjithë anëtarëve të familjes sonë të madhe politike, si edhe një ditë të mbarë të gjithë të tjerëve pa përjashtim”, shkruan Rama në rrjete sociale.
