Avokatja e Popullit, Erinda Ballanca, gjatë një interviste në emisionin “Opinion” në Tv Klan ka shpjeguar arsyet kryesore pse sistemi i drejtësisë në Shqipëri përballet me mungesë të gjyqtarëve.
Sipas saj, procedura e hyrjes në sistem është tepër e kufizuar dhe bëhet pothuajse ekskluzivisht përmes Shkollës së Magjistraturës, çka e bën të vështirë plotësimin e vendeve vakante në Gjykatat e Shkallës së Parë dhe të Apelit.
Ballanca theksoi se ky është një model i zgjedhur nga vetë sistemi shqiptar, i cili kërkon një trajnim të specializuar për gjyqtarët e niveleve të para, ndryshe nga Gjykata e Lartë apo Kushtetuese, ku mund të emërohen edhe persona me eksperiencë të gjatë profesionale jashtë magjistraturës.
Erinda Ballanca: Ka shumë rëndësi që ne të rrisim numrin e gjyqtarëve.
Blendi Fevziu: Pse nuk e rrisim?
Erinda Ballanca: Sepse nga ana tjetër edhe futja në sistem e gjyqtarëve nëpër gjykata është shumë e vështirë, pasi bëhet vetëm në sajë të Shkollës së Magjistraturës, për Gjykatën e Shkallës së Par dhe Gjykatën e Apelit. Këtu lindi problemi tjetër.
Blendi Fevziu: Po pse duhet bërë vetëm me Magjistraturën?
Erinda Ballanca: Ky është procesi që ne kemi zgjedhur.
Blendi Fevziu: Po ne kemi zgjedhur gjyqtarë në Gjykatën e Lartë që nuk ka Shkollë Magjistrature.
Erinda Ballanca: Edhe Gjykata Kushtetuese edhe Gjykata e Lartë ka një numër të kufizuar personazh.
Blendi Fevziu: Por, cila është logjika që Gjykata e Shkallës së Parë dhe ajo e Apelit e do student të magjistraturës, kurse Gjykata Kushtetuese që është niveli më i lartë i një shteti e dashka pa shkollë magjistrature.
