Protestuesit anti-rus në Gjeorgji po kërkojnë dorëheqjen e disa zyrtarëve të lartë dhe mbajtjen e zgjedhjeve të parakohshme, teksa po përgatiten për ditën e tretë të protestave në kryeqytetin, Tbilisi.
Protestuesit kanë thënë se protesta e sotme do të jetë paqësore, pasi dy ditë më parë ata u përleshën me policinë, ku u lënduan dhe u arrestuan qindra persona.
Disa qindra protestues kanë qëndruar pranë ndërtesës së Parlamentit pasi kryetari i Parlamentit, Irakli Kobakhidze dha dorëheqje më 21 qershor. Dorëheqja e tij ishte një nga kërkesat e protestuesve.
Por, figurat opozitare thonë se do të protestojë edhe sot për të kërkuar që edhe kërkesat e tjera të tyre të përmbushen, përfshirë këtu edhe dorëheqjen e ministrit të brendshëm dhe lirimin e protestuesve të arrestuar në natën e parë të protestave.
Protestuesit, po ashtu po kërkojnë ndëshkimin e forcave të rendit që përdorën dhunë ndaj protestuesve si dhe mbajtjen e zgjedhjeve të parakohshme parlamentare.
Protestuesit në Tbilisi, fillimisht u mblodhën më 20 qershor për të shprehur zemërimin e tyre, pasi zëvendëskryetari i Dumës ruse, Sergei Gavrilo, ishte ulur në ulësen e kryeparlamentarit gjeorgjian./ Opinion.al
