Qindra mijëra njerëz u mblodhën në të gjithë Francën për raundin e katërt të protestave mbarëkombëtare kundër reformës së pensioneve. Presidenti Emmanuel Macron planifikon të rrisë moshën e pensionit nga 62 në 64 vjeç, por kjo po kundërshtohet nga qytetarët.
“Nuk është çështja të duash të punosh, por sa mundesh. Unë jam me fat që po bëj studimet për teatër, që është pasioni im. Por jo të gjithë e kanë këtë shans. Dhe duhet të pranojmë se disa profesione janë rraskapitëse”, u shpreh një protestues.
Në një deklaratë të përbashkët përpara këtij marshimi, të gjitha sindikatat kryesore në vend kërkuan që qeveria të tërheqë projektligjin. Ata paralajmëruan se do të bllokonin Francën nga 7 Marsi nëse kërkesat e tyre nuk plotësoheshin.
“Kjo reformë nuk duhet të kalojë. Emmanuel Macron e di shumë mirë, por harron, se jo të gjithë votuan programin e tij. Shumica e njerëzve nuk votuan. Dhe ata që votuan, votuan kundër Marine Le Pen. Kështu që ai nuk duhet të harrojë se demokracia ka të bëjë me qeverisjen e popullit. Dhe tani, njerëzit po i thonë “Jo””.
Francezët kanë moshën më të re të daljes në pension mes vendeve të Organizatës për Bashkëpunim dhe Zhvillim ekonomik dhe sipas sondazheve një shumicë e konsiderueshme e francezëve duan ta ruajnë këtë përfitim.
Klan News
