Opozita ka njoftuar se më 8 korrik do të zhvillojë protestën e radhës kombëtare kundër qeverisë “Rama”.
Ndërkohë, kreu i PD, Lulzim Basha, është shprehur i vendosur duke thënë se qëndrimi i tyre është i pandryshuar, ndërsa ka theksuar se vetëm me qeveri tranzitore mund të garantohen zgjedhje të lira dhe të ndershme.
Këtë deklaratë kreu i selisë blu e dha gjatë mbledhjes së Kryesisë së PD. Kryedemokrati është shprehur se kryeministri Edi Rama dështoi në planin e tij për të përçarë opozitën
“Qendrimi ynë është i pandryshueshëm, 30 qershori vetëm na motivon më shumë në vendosmërinë tonë: largimi i Edi Ramës, ndëshkim të politikanëve që vodhën zgjedhjet në bashkëpunim me krimin dhe të gjithë atyre që organizuan dhe zbatuan farsën e 30 qershorit, qeveri tranzitore, zgjedhje të lira e të ndershme, parlamentare dhe lokale. Edi Rama me kukuvajkat dhe mercenarët e tij dështuan në planin tashmë të zbardhur për ta përcarë PD dhe opozitën. PD dhe opozita dolën më të fortë dhe më të bashkuar nga 30 qershori. Ata nuk meritojnë asnjë vëmendje apo harxhim kohe. Injorojoni, përbuzini, e gjithë energjia në aksionin politik kundër padronit dhe financuesit të tyre, Edi Ramës”,- shton Basha./ Opinion.al E.Xh.
