Deputeti i Partisë Demokratike, Luçiano Boçi në një deklaratë për mediat nga protesta e Elbasanit paralajmëroi që protestat që nisën sot do të shtrihen në të gjithë vendin.
Boçi tha se qytetarët janë të revoltuar jo vetëm për rritjen e çmimeve, por edhe për pasigurinë e jetës, shpopullimin etj.
Ndër të tjera ai theksoi se rritja e çmimit të naftës është një vjedhje e hapur. Sipas Boçit qeveria ka nevojë për para se janë zgjedhjet përpara dhe përmes karburantit po ua merr shqiptarëve.
“Nuk është vetëm çështja e rritjes së naftës, është rritur pasiguria, shpopullimi dhe duhet reagim. Të parët sot janë qytetarët e Elbasanit. Krahas asaj urtësisë klasike Elbasani ka edhe pjesën e revoltës.
Rritja e çmimit të naftës është një vjedhje e hapur. Bordi është antikushtetues dhe qeveria sa herë ka nevojë për para që i përdor për luksin e saj ua rrëmben shqiptarëve në forma të ndryshme, një nga këto forma është edhe përmes karburantit.
Nuk ka paketa ndihme ndaj krizës, nuk ka ndihmë për studentët, shtresat në nevojë. Situata bëhet më revoltuese kur çmimet në burse bien në mënyrë progresive, ndërsa në Shqipëri rriten në mënyrë të menjëhershme.
Ka një situatë zgjedhore përpara dhe qeverisë i duhen para për të blerë votat.
E nisëm këtu nga Elbasani si shkëndijën e parë, për ta shtrirë në gjithë Shqipërinë. Nuk ka më kohë për të humbur, është shkelur ekonomia jonë, por edhe dinjiteti ynë. Le të shërbejë për të gjitha revoltat që do shpërthejnë në gjithë Shqipërinë”, tha ndër të tjera Boçi./Opinion.al
