Katër vajza janë vënë në pranga nga policia në kuadër të operacionit policor “Inside”, pasi kishin përshtatur një qendër masazhesh, për ushtrim prostitucioni.
Në një njoftim për media, uniformat blu bëjnë me dije se pas një pune hetimore, bazuar dhe në informacionet e siguruara përmes inteligjencës informative, janë arrestuar në flagrancë shtetaset: Xh. K., 28 vjeçe, B. K., 23 vjeçe, A. P., 21 vjeçe dhe A. K., 26 vjeçe, të gjitha banuese në Tiranë.
28-vjeçarja Xh. K., administronte një qendër masazhesh, në rrugën “Margarita Tutulani”, në të cilën, përveç aktivitetit të regjistruar ligjërisht si qendër masazhesh, ushtrohej edhe aktiviteti i kundërligjshëm i prostitucionit.
“Në vijim të veprimeve, nisi procedimi në gjendje të lirë edhe për A. R., 31 vjeçe, punonjëse në këtë qendër masazhesh, si dhe për shtetasit E. A., 27 vjeç, E. C., 34 vjeç, S. M., 32 vjeç dhe A. P., 28 vjeç, klientë në këtë qendër masazhesh”-njofton policia.
Në cilësinë e provës materiale u sekuestruan 6 aparate celulare, shumat 351.000 lekë të rinj dhe 550 euro, të dyshuara të përfituara nga kjo veprimtari e paligjshme.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale./Opinion.al
