Porositësi i vrasjes së parandaluar në Shijak mendohet se është pronari i një firme betoni në Qarkun e Durrësit. Porosia prej 10 mijë eurosh dyshohet se është dhënë për të eliminuar personin që i kishte vrarë vëllain.
Konflikti zë fill në korrik të vitit 2013, kur në Shijak u vra një person dhe mendohet se vëllai i viktimës, i cili është biznesmen ndërtimi, ka dhënë porosi për të vrarë hasmin.
Lajmin e bëjnë të ditur për gazetën “Shqip” burime nga Policia e Shtetit, të cilat konfirmojnë se fillimisht këto dy grupe që trafikojnë drogë e tashmë janë ndarë, kanë punuar bashkë jashtë shtetit (kryesisht në Holandë) dhe pas krijimit të armiqësisë, para dy vitesh u vra një person në Shijak. Përpos atentatit të përgatitur ndaj një banori të Shijakut, tre të arrestuarit nga
Policia e Durrësit akuzohen edhe për disa ngjarje të rënda kriminale, brenda dhe jashtë vendit, ku baza e urdhrave ka qenë eliminimi i kundërshtarëve në trafikun e drogës. Ndërkaq, gjatë marrjes në pyetje, Gazmend Dervishi, Dritan Nikolla dhe Bruno Shehu, që u arrestuan të martën në afërsi të fabrikës së tullave në Maminas, janë shprehur se armët dhe maskat do t’i përdornin për grabitje, por grupi hetimor ka të dhëna se ata janë vrasës me pagesë.
Telefonat e tyre përgjoheshin prej kohësh dhe ishin skeduar disa telefonata, ku plani ishte që pas vrasjes së një të riu në Shijak, për të cilën do të merrnin 10 mijë euro, ata do të kalonin me një automjet tjetër, që do t’i priste në rrugën dytësore që lidh Maminasin me autostradën Durrës-Tiranë. Në qendër të atentatit të porositur mendohet se qëndron një konflikt 15-vjeçar mes dy familjeve të Shijakut, ndërsa përplasjet janë krijuar fillimisht në Itali, për konkurrencën në trafikun e drogës dhe prostitucionit.
Në CV-në kriminale të tre të arrestuarve, spikasin katër ngjarje (dy në Shijak, një në Tiranë dhe një në Holandë). Por hetimet janë zgjeruar së tepërmi, pasi ka indicie dhe elemente që dyshohet se i përfshijnë ata në ngjarje kriminale, siç mund të jetë vrasja e Gazmend Çollakut, në këtë fillimviti në Durrës apo të tjera dosje me peshë.
Tre vrasësit me pagesë mendohet se e kishin shtrirë aktivitetin e tyre edhe në Spanjë, Holandë dhe Itali. Ndërsa për akuzat në Shqipëri, mendohet se në korrik të vitit 2013 kanë vrarë një person në Shijak dhe një vit më vonë (qershor 2014) tentuan të vrisnin një tjetër po në Shijak.
Ata dyshohet se në dhjetor të vitit 2015 kanë plagosur dy persona në Holandë, 23 dhe 28 vjeç. Sakaq, tre personat mendohet se kanë lidhje me një atentat të ndodhur korrikun e vitit të kaluar në rrugën “Don Bosko”, në Tiranë, ku u plagos rastësisht 29-vjeçarja me inicialet R.L. Asokohe u la në “arrest me burg” shtetasi K.Budlla (objektiv i atentatit të dështuar), ndërsa dy të tjerë u lanë të lirë. Prokuroria dyshonte se shkëmbimi i zjarrit ka ardhur për prishjen e pazareve të drogës në Itali dhe Spanjë, ku K.Budlla kishte vuajtur edhe dy dënime me burg.
Në Policinë e Durrësit kanë mbërritur edhe ekspertë të Krimeve të Rënda nga Policia e Tiranës, për të ballafaquar provat për sa i përket atentatit të korrikut 2015 në “Don Bosko”. Pavarësisht hetimeve, policia është treguar e kujdesshme, duke mos dhënë identitetet e anëtarëve të tjerë të këtyre grupeve, për shkak të hetimeve në vijimësi. Grupi hetimor po grumbullon prova materiale dhe dëshmi, për ta dërguar më pas dosjen në Prokurorinë e Krimeve të Rënda. /gazeta shqip/
