Prokuroria e Apelit për Krime të Rënda ankimoi vendimin e pafajësisë për 10 anëtarët e të ashtuquajturës “Hakmarrja për Drejtësi”.
Rekursi në Gjykatën e Lartë është dorëzuar, duke kërkuar kështu shfuqizimin e vendimit të pafajësisë. Në rekurs, thonë prokurorët, kërkohet të lihet në fuqi vendimi i Shkallës së Parë, që shpalli fajtor të pandehurit për 17 akuza të rënda penale.
Burimet nga prokuroria për AbcNews thanë se duhet të lihen në fuqi dënimet: Burgim të përjetshëm për Altin Arapin, Orik Shytin dhe Gentian Cakën, 25 vite burg Roland Shyti. Ndërsa Dritan Hate, Leart Shyti, Nikolin Novruzaj dhe Kreshnik Spahiu, prokuroria thotë se duhet të shpallen fajtor dhe të dënohen me nga 24 vite burg secili. Ndërkaq i pandehuri Pasho Novruzaj, sipas akuzës, duhet të dënohet me 17 vjet heqje lirie, ndërsa Gëzim Gjoni me 5 vjet burg. Këto masa dënimi, sipas prokurorisë janë dhënë nga Gjykata e Shkallës së Parë për Krime të Rënda dhe duhet të lihen në fuqi, duke shfuqizuar vendimin e Apelit që i shpalli të pafajshëm 10 të pandehurit.
Vetëm pak ditë më parë, pesë gjyqtarët Alaudin Malaj, Artur Kalaja, Stavri Kallço, Sotiraq Lubonja dhe Etleva Temo të cilët ishin deleguar nga KLD-ja për gjykimin e dosjes, i dhanë pafajësi 10 personave të lartpërmendur.
Ata argumentuan pafajësinë, me faktin se Gjykata e Lartë kishte shpallur të pavlefshme shumë prova, të cilat fajësonin anëtarët e të ashtuquajturës “Hakmarrja për Drejtësi”.
Për vendimin e pafajësise ka nisur edhe nje hetim administrativ nga KLD-ja.
