Kryetari i Partisë Demokratike Lulzim Basha, të martën, reagoi pas lajmit se prokuroria nuk ka nisur procedim penal për kallëzimin e opozitës për kryeministrin Edi Rama.
Përmes një shënimi në Facebook, Basha shkruan se prokuroria ka refuzuar të hapë hetimet për Edi Ramën, edhe pse mashtroi publikisht se kishte bërë ekspertizë private të audiopërgjimit, me qëllim të qartë që të mbronte një kriminel dhe për të ndikuar dhe kërcënuar organet e drejtësisë që të mos hetonin.
Ai thekson se prokuroria, gjithashtu ka refuzuar të marrë nën hetim Ardi Veliun dhe Taulant Ballën.
Duke shtuar se ditën e sotme prokuroria lëshoi përmes mediave të pushtetit lajmin se Saimir Tahiri e ka të ligjshëm gjithë luksin në të cilin jeton. Sipas tij, është e njëjta prokurori që burgosi kuksianët, që burgos përditë njerëzit e thjeshtë për shkeljet më të lehta, që heton gazetarët kritikë dhe kundërshtarët politikë.
Kreu i PD-së, tha se në Shqipëri janë vendosur dy drejtësi: një për Edi Ramën dhe kriminelët dhe një tjetër për popullin.
“Edi Rama dhe kriminelët janë mbi ligjin, kurse mbi popullin ushtrohet dhunë duke abuzuar ligjin. Kësaj “drejtësie” do ti vijë fundi shumë shpejt!”,-citohet nga shënimi i Bashës në Facebook.
Padia e opozitës u depozitua në Prokurori nga dy kryetarët e grupeve parlamentare të Partisë Demokratike dhe LSI, përkatësisht Edmond Spaho dhe Petrit Vasili, në lidhje me deklaratën e kryeministrit Rama për “përgjigjen e analizës shkencore të kryer në një nga laboratorët më serioz të botës”.
