Ka vende që e praktikojnë menjëherë shtetësinë për fëmijët e lindur të shtetasve të huaj në tokën e tyre, ka vende që nuk krijojnë një lehtësi të tillë.
Shqipëria duket se nuk është ende e gatshme për të marrë një nismë të tillë.
Të paktën kështu thotë Rovena Voda, zv/ Ministre e Brendshme, e cila njofton se është kryesuesja e grupit të punës për hartimin e projektligjit të ri për shtetësinë.
“Janë vende me demokraci shekullore dhe ende nuk janë ndier të gatshme për ta përfshirë këtë lloj fitimi shtetësie në kriteret ligjore të fitimit të saj. Kështu që edhe ne menduam që Shqipëria, një vend me demokraci 27-vjeçare mendojmë të mbajmë linjën e përgjithshme të vendeve të BE-së duke mos e përfshirë këtë lloj mënyre fitimi në kriteret ligjore të përfitimit të saj”, shprehet Voda.
Për Tema Tv, znj. Voda njoftoi gjithsesi se ligji i ri do të ketë lehtësi për ata që duan të fitojnë shtetësinë në bazë të origjinës.
“Tashmë, fitimi i shtetësisë përmes origjinës është futur shprehimisht në ligj si një nga mënyrat e fitimit të shtetësisë. Sigurisht që VKM ekzistues, do të shfuqizohet. Është menduar që ky projektligj i ri do të zgjidhë problematikat e mosregjistrimit në Regjistrin Kombëtar të Gjendjes Civile të vitit 2010 të personave që kanë fituar shtetësinë shqiptare me dekret”, tha Voda.
Po kështu në projektligjin e ri, do të mendohet edhe për ata shtetas që duan të riaplikojnë për shtetësinë shqiptare
“Një person që aplikon në një shtet tjetër për të fituar shtetësinë dhe ndërkohë e ka humbur shtetësinë shqiptare, mund ta fitojë automatikisht brenda dy vitesh nëse nuk ka marrë shtetësinë në shtetin tjetër. Pra, mund të bëjë kërkesë dhe brenda dy viteve automatikisht e merr prapë”, thotë Voda.
Një tjetër lehtësi që do të krijohet me projektligjin e ri është edhe mundësia e pajisjes me shtetësi shqiptare të fëmijëve që kanë lindur në një shtet tjetër, por që kanë dy prindër shqiptarë.
“Ne kemi parashikuar që automatikisht këta fëmijë të lindur nga prindër shqiptarë të regjistrohen si shtetas shqiptarë në regjistrin e gjendjes civile”, shpjegoi Voda.
