Një projektligj që ndalon fjalimin apo mënyrën e veshjes, të cilat konsiderohen të dëmshme për shpirtin e popullit kinez, ka zgjallur mjaft debate në Kinë.
Nëse ligji hyn në fuqi, personat e shpallur fajtorë mund të gjobiten ose burgosen, por propozimi nuk përcakton ende se çfarë përbën shkelje.
Përdoruesit e mediave sociale dhe ekspertët ligjorë kanë bërë thirrje për më shumë qartësi për të shmangur zbatimin e tepruar të këtij ligji.
Kina publikoi së fundmi një sërë ndryshimesh të propozuara në ligjet e saj të sigurisë publike – reformat e para në dekada.
Ligji i veshjeve ka tërhequr reagime të menjëhershme nga publiku – me shumë në platformat online që e kritikojnë atë si të tepruar dhe absurd.
Klauzolat e diskutueshme sugjerojnë që njerëzit që veshin ose detyrojnë të tjerët të veshin veshje dhe simbole që “minojnë shpirtin ose lëndojnë ndjenjat e kombit kinez” mund të ndalohen deri në 15 ditë dhe të gjobiten deri në 5,000 juanë (680 dollarë; 550 £).
Ata që krijojnë ose shpërndajnë artikuj ose fjalime që e bëjnë këtë, gjithashtu mund të përballen me të njëjtin ndëshkim.
Ndryshimet ligjore të propozuara ndalojnë gjithashtu fyerjet, shpifjet apo cënimin e emrave të heronjve dhe martirëve vendas si dhe dëmtimin e statujave të tyre përkujtimore.
Në internet, njerëzit vunë në dyshim se si zbatuesit e ligjit mund të përcaktonin se kur “ndjenjat” e kombit “lëndohen”.
“A do të vlejë veshja e një kostumi dhe kravata? Marksizmi e ka origjinën në Perëndim. A do të llogaritet prania e tij në Kinë si lëndim i ndjenjave kombëtare,” postoi një përdorues në platformën kineze Weibo të ngjashme me Twitter.
Ekspertët ligjorë në vend kanë kritikuar gjithashtu formulimin e paqartë të ligjit, duke thënë se ai mund të jetë i hapur për abuzim.
Zhao Hong, një profesor i drejtësisë në Universitetin Kinez të Shkencave Politike dhe Ligjit tha se mungesa e qartësisë mund të çojë në një shkelje të të drejtave personale.
“Po sikur zbatuesi i ligjit, zakonisht një oficer policie, të ketë një interpretim personal të lëndimit dhe të inicojë gjykimin moral të të tjerëve përtej fushëveprimit të ligjit,” shkroi ai në një artikull të botuar të mërkurën.
Ai përmendi një rast që tërhoqi titujt në Kinë vitin e kaluar, ku një grua e veshur me kimono u arrestua në qytetin e Suzhou dhe u akuzua për “zgjedhjen e grindjeve dhe provokimin e telasheve” sepse kishte veshur veshjen japoneze. Incidenti shkaktoi zemërim në mediat sociale kineze.
