Ambasadorja e Bashkimit Europian në Tiranë, Romana Vlahutin theksoi të mërkurën se Shqipëria e meritoi rekomandimin e kushtëzuar për hapjen e negociatave me Bashkimin Evropian. Sipas saj janë zbatuar prioritet dhe tashmë mbetet vetëm zbatimi i ligjit të Vettingut. ” Thelbi i çështjes është sundimi i ligjit e duhet të ketë përpjekje në luftën kundër korrupsionit, krimit të organizuar, dënimin e zyrtarëve të lartë, luftës kundër kultivimit të kanabisit”, deklaroi Vlahutin.
Vlahutin i dorëzoi zyrtarisht progres raportin Kryeministrit Rama dhe më pas mbajtën një konferencë të përbashkët për mediat.
Sipas diplomates së BE në Tiranë, Komisioni Evropian ka arritur në vlerësimin që Shqipëria ka treguar progres apo ecuri të vazhdueshme, të qëndrueshme që e meriton këtë rekomandim, por që ka dy gjëra të rëndësishme që nuk duhet të harrojë.
“Së pari kjo varet nga zbatimi i mëtejshëm i paketës së reformës në drejtësi, e në veçanti Ligji i Vettingut dhe së dyti nuk duhet të lëmë mënjanë 5 prioritetet kyçe të cilat vazhdojnë të mbeten në fokusin e punës sonë të përbashkët. Shqipëria me rekomandimin për çeljen e negociatave ka arritur një gur të rëndësishëm kilometrik dhe e gjithë puna dhe përkushtimi që pamë për paketën e reformës së drejtësisë ishte një lëvizje vendimtare dhe guximtare”, nënvizoi ajo.
