Në garë për drejtimin e Byrosë Kombëtare të Hetimit (BKH) janë 13 kandidatë. Mes tyre spikasin disa emra, siç është ai i Gledis Nanos, por edhe ai i Haki Çakos.
Të dy kanë mbajtur dikur postin e drejtuesit të Policisë së Shtetit. Aplikantët e tjerë vijnë po ashtu nga radhët e policisë, Agjencisë së Mbikëqyrjes së Policisë, nga vetë BKH-ja dhe nga prokuroritë.
Në këtë artikull ne do të bëjmë një profil të të gjithë kandidatëve.
Gledis Nano – Ai e dorëzoi aplikimin për këtë pozicion, më 6 Qershor, në ditën e fundit të afatit. Nano ka drejtuar Policinë e Shtetit për 10 muaj, nga tetori 2021 deri në gusht 2022.
Ai u shkarkua me vendim të Këshillit të Ministrave me argumentin se nuk kishte përmbushur objektivat e punës. I lindur në qytetin e Shkodrës, me origjinë nga Skrapari dhe i rritur në Tiranë, Nano u diplomua si një nga oficerët me rezultatet më të larta gjatë periudhës 199-2002.
Ai ka shërbyer si inspektor i Krimeve në Korçë e Tiranë, si shef seksioni në disa drejtori dhe si drejtor i Antiterrorit. Në këtë pozicion ai u vlerësua veçanërisht edhe nga SHBA-të pas disa operacioneve të suksesshme.
Haki Çako – Ai mbajti detyrën e Drejtorit të Përgjithshëm të Policisë së Shtetit prej afro 3 vitesh, por u shkarkua në Janar të vitit 2018.
Përpara kësaj detyre ai kishte mbajtur disa funksione të tjera të larta në policisë, ku drejtori edhe drejtorinë e Gjirokastrës në kohën kur u zhvillua operacioni anti-kanabis në Lazarat.
Aktualisht Çako është Drejtor i Përgjithshëm i Agjencisë Kombëtare të Mbrojtjes Civile.
Artur Beu – Është një nga emrat që vjen nga radhët e Policisë së Shtetit. Kjo nuk është hera e parë që ai kandidon për të qenë në krye të BKH-së. Edhe në vitin 2020, ishte në garë, por postin e fitoi Aida Hajnaj.
Ai ka shërbyer si specialist i marrëdhënieve ndërkombëtare në Interpol. Në vitin 2017 ka qenë edhe koordinator i misionit të fluturimeve ajrore.
Gentian Ndoi – Sërish një tjetër emër nga radhët e policisë. Ka drejtuar Krimet Ekonomike dhe Financiare në Policinë e Shtetit. Ai ka një karrierë të gjatë në polici.
Gentjan Shehaj – Ka mbajtur disa role të rëndësishme në Policinë e Shtetit. Ka qenë drejtës i Policisë së Vlorës si dhe përgjegjës i departamentit të policimit në patrullë në Akademinë e Sigurisë. Edhe ai kandidon për herë të dytë për BKH-në njësoj si Beu.
Joni Keta – Një tjetër emër që kandidon për BKH-në është edhe zëvendës drejtori aktual i saj, Joni Keta.
Elton Kërluku – Punon gjithashtu në BKH. Është hetues financiar.
Andi Pogaçe – Vjen nga radhët e prokurorisë. Aktualisht është prokuror në Tiranë. Më herët ka shërbyer edhe në Prokurorinë e Fierit. Ka qenë këshilltar ligjor edhe pranë Këshillit të Lartë të Prokurorisë.
Astrit Halilaj – Ai u shkarkua këtë vit nga Komisioni i Pavarur i Kualifikimit nga detyra e prokurorit të Shkodrës. Komisioni arriti në përfundimin se ai kishte kryer deklarim të pamjaftueshëm për pasuritë.
Ndërkohë, Halilaj u vlerësua pozitivisht për pastërtinë e figurës dhe për profesionalizmin. Astrit Halilaj e filloi karrierën si oficer i policisë gjyqësore në vitin 1993 dhe përgjatë dy dekadave ka mbajtur pozicione drejtuese në Policinë e Shtetit.
Prej vitit 2016, ai punoi si prokuror pranë Prokurorisë së Rrethit Gjyqësor Shkodër.
Marinela Pilinçi – Një emër tjetër që vjen nga prokuroria. Në vitin 2022 u emërua oficere e Policisë Gyqësore pranë Prokurorisë së Pogradecit.
Nevrus Ndregjoni – Punon aktualisht si oficer i Policisë Gjyqësore në Elbasan.
Maoricio Sheldija – Shërben si inspektor i Agjencisë së Mbikëqyrjes Policore për rajonin e Shkodrës. Më herët ka qenë pjesë e Policisë së Shtetit.
Miklovan Kanani – Për këtë kandidat nuk ka asnjë informacion publik.
Si do të zgjidhet kreu i BKH-së?
Sipas rregullores, do të ndiqen 6 hapa për emërimin e kreut të BKH-së, të cilat janë verifikimi i aplikimit, vizita mjekësore dhe testi për aftësitë fizike, ese me shkrim dhe test për arsyetim logjik, testi i poligrafit dhe intervista në panel, verifikimi i figurës dhe pasurisë, identifikimi i kandidatit fitues, trajnimi dhe emërimi.
Tek pika e fundit parashikohet dhe përzgjedhja e katër kandidatëve më potencialë, që i dërgohen drejtuesit të SPAK. Altin Dumani do të bëjë përzgjedhjen përfundimtare dhe emri i kandidatit të përzgjedhur i paraqitet Këshillit të Lartë të Prokurorisë për miratimin e mandatit 5-vjeçar.
Aktualisht Byroja Kombëtare e Hetimit drejtohet nga Aida Hajnaj, e cila i përfundon mandati më 31 gusht. Ajo nuk arriti të dorëzonte dokumentacionin brenda afatit të aplikimit./ Tv Klan
