Sot Komisioni Qendror i Zgjedhjeve u dha mandatet katër deputetëve të rinj të LSI-së. Në qarkun e Tiranës morën mandatet Ylli Shehu dhe Edmond Rrushi, në Elbasan Enver Roshi dhe në Dibër Aurora Mara. Por cilët janë ata? Më poshtë mund të lexoni nga një profil të shkurtër për secilin.
Edmond Rrushi
Edmond Rrushi ka përfunduar arsimin e mesëm në Durrës në vitin 1988, ndërsa ka studiuar në Fakultetin e Drejtësisë në Tiranë rreth 20 vite më vonë, në vitet 2001-2005. Në CV-në e dorëzuar nga ai vetë në Komisionin Qendror të Zgjedhjeve, Edmond Rrushi është bërë pjesë e Komitetit Drejtues të LSI-së në vitin 2012, ndërsa nga viti 2017 është anëtar i Kryesisë i kësaj partie. Në eksperiencat e tij të punës, Edmond Rrushi jep atë të avokatit prej vitit 2007, pedagogut të jashtëm në Universitetin “Justiniani I”, zëvendësdrejtor i ALUIZNI-t në periudhën mars-shtator 2012, Drejtorit të QSUT-së nga shtatori 2012 në prill 2013, ndërsa prej vitit 2014 kryeinspektor në ISHMP në Tiranë. Gjatë periudhës që ka drejtuar Qendrën Spitalore Universitare Nënë Tereza, Edmond Rrushi është akuzuar nga Kontrolli i Lartë i Shtetit për shpërdorim fondesh dhe procedura të paligjshme në mirëmbajtjen dhe riparimin e një rezonance manjetike dhe tre skanerëve.
Ylli Shehu
Në fushatën e vitit 2017, Ylli Shehu u konsiderua nga Ilir Meta si një prej përfaqësuesve më të spikatur të komunitetit. Sipas CV-së së tij, ai ka studiuar në dy fakultete. Në vitin 2006 ka nisur studimet në Universitetin kristal, tashmë i mbyllur, për t’i përfunduar në vitin 2011. Megjithatë, gjatë kohës që ishte student, në vitet 2009-2011 ka punuar si jurist në Prefekturën e Kukësit. Në vitin 2009 ka nisur studimet në Fakultetin Ekonomik, pa dhënë detaje nëse e ka përfunduar apo jo. Ai ka qenë për dy vite këshilltar i Xhelal Mziut në Bashkinë e Kamzës, e më pas këshilltar i Fatmir Mediut në Ministrinë e Mjedisit. Fatmir Mediu vendosi që në zgjedhjet e vitit 2013 ta kandidonte të parin në Tiranë, mandat të cilin e fitoi duke u bërë deputet në moshën 32-vjeçare. Ylli Shehu ruajti një profil të ulët dhe ishte ndër deputetët “memecë” të parlamentit, që foli pak ose aspak deri në vitin 2015 kur doli kundër Fatmir Mediut pasi nuk mbështeti kandidaturën e Agron Dukës për Bashkinë e Durrësit. Pas kësaj, ai kaloi në radhët e Lëvizjes Socialiste për Integrim. Në këtë periudhë, mediat sollën në vëmendje të shkuarën e tij si këngëtar, fotografitë e çuditshme që postonte në rrjetet sociale dhe statuset me mjaft gabime gramatikore.
Enver Roshi
Enver Roshi ka lindur në Gramsh në vitin 1961. Ai kreu studimet e para në Universitetin e Tiranës për mjekësi, për t’u specializuar më pas në Shëndet Publik dhe për të ndjekur studimet në filozofi. Ai mban gradën Profesor Doktor në filozofi. Enver Roshi ka qenë Dekan i Fakultetit të Shëndetit Publik dhe Drejtor i Institutit Kombëtar të Shëndetit publik. Sipas përshkrimit të dhënë nga Lëvizja Socialiste për Integrim, ai është anëtar dhe drejtues i Shoqatave Botërore dhe Europiane të Shëndetit Publik, është autor dhe bashkëautor i shumë botimeve në shumë revista ndërkombëtare perëndimore dhe autor kapitujsh të librhave pjesë e universiteteve të huaja me të cilën punojnë studentët.
Aurora Mara
Për deputeten e re të Dibrës, Aurora Mara, ka shumë pak informacion. Sipas asaj që shkruan në profilin e saj në Facebook, aktualisht punon në Ministrinë e Infrastrukturës dhe Energjetikës. Ajo ka përfunduar një master në Universitetin La Sapienza të Romës në kriminologji./Opinion.al
