Presidenti Ilir Meta ka folur këtë të martë në lidhje me procedurën e nisur nga Kuvendi për shkarkimin e tij. Në një intervistë televizive ai e ka cilësuar si procedurë “dekorimi”.
“Në fakt unë e konsideroj si një procedurë dekorimi sepse nuk shoh asnjë shkelje të Kushtetutës së Republikës së Shqipërisë, aq më tepër natyrisht, e them me trishtim, nga një Parlament që ka thyer çdo rekord në shkeljen e qartë dhe flagrante të Kushtetutës së Shqipërisë edhe falë një kontributi që ka po ky Parlament për bllokimin e qëllimshëm të ndërtimit të Institucioneve të reja të drejtësisë dhe të Gjykatës Kushtetuese në mënyrë të veçantë. Pra, ndihem në procedurë dekorimi sepse nuk e di se cilin nen të Kushtetutës kam shkelur dhe se çfarë dëmi i kam bërë Kushtetutës dhe qytetarëve shqiptarë”, – është shprehur ndër të tjera Presidenti Meta.
I pyetur se ku është bazuar në vendimet e marra, kreu i shtetit shqiptar tha se është bazuar në pluralizimin politik, që është shtylla e gjithë Kushtetutës së Republikës së Shqipërisë.
Po ashtu ai tha ka kompetencë ekskluzive për të shpallur dhe për të caktuar datën e zgjedhjeve lokale të përgjithshme apo të zgjedhjeve parlamentare.
Në fakt dhe komisioni hetimor i ngritur për të hetuar shkeljet e presidentit duket se bëri një truk, ndërsa me vota unanime u miratua dhe thirrja për të pyetur Komisionin e Venecias./ Opinion.al
